【球迷會請入】愛隊再戰決賽 費倫躉：由巴迪高撐到依家

【Now Sports】費倫天拿上周在意大利盃飲恨後，面前還有歐協聯決賽。香港還有不少費倫天拿球迷，打從巴迪高（巴迪斯圖達）年代就追捧紫百合，且聽香港費倫天拿球迷專頁的代表Pafio如何評估決賽，以及選出歷來最強11人。

Q：即將（下周三）同韋斯咸爭歐協聯冠軍，勝算有幾高？勝負關鍵喺邊？
我覺得係「六四波」——鎚仔六費倫四。球隊喺上星期意大利盃決賽落敗，其實個人擔心球隊嘅情緒，球迷短時間內都難以消化，球員嘅心情都不敢想像，能否將悔恨轉化為動力會係關鍵之一。另外一向以「派膠」聞名嘅防線，同以失機聞名嘅鋒線可唔可以爭返口氣都係關鍵。

Q：可否簡介一下你哋球迷群組？
本page係2016年由admin Will所創立，及後2017年我（Pafio）同另一admin Sam加入，然後一直以3人形式經營。喺呢度好想藉此機會感謝兩個拍檔，冇佢哋支持同一齊做決策真係堅持唔到咁耐。另外有賴大家支持，直到依家專頁已經成立近7年，fb專頁既like已經超過800個。
本page旨在令一眾費倫迷知道，除咗自己仲有啲癲佬都仲支持緊呢隊波，分享下球會新聞、有個地方畀大家傾計，所以一直堅持，盡量每一場都可以有一個即時po，畀大家吹水、交流。另外有介紹當地文化、美食嘅單元企劃，例如歷史介紹、自己嘅朝聖遊記去令大家鍾意隊波嘅同時，都可以了解埋呢個城市嘅文化、歷史，亦想畀啲資訊大家當地旅遊睇波係點，未來都希望再推出類似嘅企劃。
球迷朋友嘅年齡層大部份都係30至40歲左右，人數唔算多，都係20人左右嘅小規模，但勝在人少好熟絡。另外，我哋都有足球隊一直以球會友，認識咗其他友好球迷會，例如布力般球迷會、AC米蘭球迷會、帕爾馬球迷會、阿根廷球迷會等，當中更加同帕爾馬球迷會有過聯合睇波活動，非常期待以後再一齊睇波。除咗踢波、睇波都有聚餐之類嘅恆常聚會活動。

Q：費倫天拿近代起起跌跌，維繫球迷會會否因此困難咗？
紫百合迷都見慣大風大浪，而且大部份仲喺度嘅球迷，都係巴迪高年代開始到家陣，所以都係非常忠實嘅球迷。近年嘅起起跌跌，基本上都無阻大家支持球隊嘅心。有成績嘅時候一齊開心，護級嘅時候一齊邊鬧邊愛。當然仲有傷心嘅時候，大家都互相安慰互相支持，艾斯托尼【編按，已故隊長，2018年因心臟病離世】永遠喺我哋心入面。

Q：同我哋之前訪問帕爾馬球迷一樣，請排出費倫天拿歷來最強11人。
好困難嘅問題，單單中前場就太多選擇，我就依照個人喜好嚟排，相信球迷應有更多唔同嘅組合：

4-3-1-2
門將：托度
後衛：柏斯哥、艾斯托尼、G洛迪古斯、烏化奴斯
中場：當拿度、大衛比沙路、雷哥斯達
前場自由人：巴治奧
前鋒：巴迪斯圖達、東尼
教練：柏蘭迪利

Q：如果要揀今季表現最突出嘅一名球員，會係邊個？
同樣非常困難嘅問題，因為喺好嘅方面，的確無邊個特別突出。我會揀門將達拉贊奴【編按：Now TV譯特拉贊奴】。佢同邦拿雲度拉絕對係今季表現比較穩定嘅兩名球員，兩個我都覺得好好。最後考慮到即時po「要不是達叔」呢句出現頻率之高，我會投達拉贊奴一票。

Q：對球隊來季有何展望？
希望球隊穩定度可以提高，目標係可以繼續爭取歐洲賽，不論任何級別，都希望可以保持有歐洲賽。

Q：球迷會嚟緊有咩活動？
好可惜歐協聯係周中，好難搞到睇波。所以應該會喺歐協聯決賽後搞聚餐。

Q：可否推介一個與你們友好嘅本地球迷會/群組？
Argentina Football Fans Club - AFFC 阿根廷球迷足球隊

相關文章：
【球迷會請入】維拉球迷：我哋睇住加利殊大
https://sports.now.com/home/news/details?id=38617088895
【球迷會請入】紐卡素球迷會：煞科戰打邊爐睇波
https://sports.now.com/home/news/details?id=38582838465
【球迷會請入】帕爾馬球迷：我哋有咩未經歷過？
https://sports.now.com/home/other/details?id=38538818560
【球迷會請入】白禮頓球迷：好有信心進軍歐洲
https://sports.now.com/home/news/details?id=38494029616
【球迷會請入】AC米蘭球迷：歐聯入決賽一定大搞睇波
https://sports.now.com/home/other/details?id=38444516918
【球迷會請入】賓福特香港球迷會：贏曼聯4：0收穫大
https://sports.now.com/home/news/details?id=38403816700
【球迷會請入】香港多蒙特球迷：平常心睇爭霸
https://sports.now.com/home/news/details?id=38357300105
【球迷會請入】「我可能係香港唯一布力般球迷......」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

國際米蘭提前3輪奪意甲

18小時前

杜莫利領紅 沙素路兩球挫AC米蘭

2026/05/03 23:03

水晶宮搶先機 加士拿：主場必須表現更好

2026/05/01 07:46

21秒入波快過打針 水晶宮3：1「薩」敵

2026/05/01 05:14

國米奪冠在即 捷禾感謝球員信任

2026/05/01 00:15