【球迷會請入】賓福特香港球迷會：贏曼聯4：0收穫大

【Now Sports】賓福特升班以來屢次遇強愈強，本季初大炒曼聯4蛋，連賓福特香港球迷會也因而受注視，且細聽賓福特香港球迷會會長Desmond講述這次「威水史」。對於愛隊爭取歐洲賽資格，他就認為爭得到也未必好。

Q：可否簡介一下你哋球迷會？
如果講fb個page開嘅話，只不過係呢兩年，即係賓福特啱啱開始升上英超，我至開個page。我自己本身鍾意隊波都5、6年，嗰陣時喺英冠嘅年代，甸史密夫，即係依家李斯特城領隊帶緊隊波嘅時間已經留意呢隊波。到升英超嗰刻，我覺得，咦，好似有啲機會多啲人留意隊波，所以至開呢個page，目標係希望聚集一啲對呢隊波有興趣嘅人。目前球迷會規模極細，依家得我一個admin，其實得2、3個fan club嘅人我係見過，係做波衫團購嘅時候同佢哋交收，吹下水。反而依家有幾個過咗西倫敦嘅香港人，當中有2、3個買咗季票，佢哋會去我哋fan club留言。我諗fan club年齡層大概係20至40歲。

Q：賓福特人氣唔及歐洲主流班霸，當初成立球迷會經過有何困難？
唔困難，好輕鬆，因為冇乜大期望。當隊波升英超第1年都唔係好多人留意，喺我哋度留言嘅人唔多，直到今季初對曼聯上半場贏緊4:0嘅時候，突然間爆發，好多人follow，留言嘅人都多咗，好開心。嗰場亦係曼聯轉捩點，令坦夏要同球員一齊去跑步。嗰場上半場已經係4:0，到完場時，我喺球迷會個page問大家開唔開心，大家話唔開心（哈哈），因為下半場冇入波。大家或者都買咗下一球繼續係賓福特或者其他嘢……嗰場對於我哋球迷會收穫好大。

Q：今季流失好波之人基斯甸艾歷臣，但戰績反而更勝上季，原因何在？
講返上季嘅賓福特，一開始嘅時候畀人感覺都幾耳目一新，高位逼搶好快，去到中段因射手東尼同門將拉也都傷咗，成績慢慢滑落。直到搵到艾歷臣，佢幫咗好多好多手，做咗賓福特長期都冇嘅，即係中間有個人hold波、派牌，幫隊波掹掹緊護級。今季成個隊型、戰術完全轉晒，見到領隊法蘭用咗好多心機調校以我哋班底、人腳，有限資源應該點樣去踢。今季，賓福特嘅long pass次數係遠高於其他任何球隊。冇咗艾歷臣，咪唔喺中場做波囉，後衛一腳踢上去，捉到就捉到，捉唔到就由中場去執second ball，好多時靠呢啲戰術做上去。上季對利物浦（3:3）嘅時候，畀人感覺係好多高位逼搶，進攻急勁，但今季好少呢啲波，基本上冇晒高位逼搶，反而係墮後做返好防守，好多時用long ball放上去。我覺得係戰術上調動，同埋一路以嚟死球戰術處理得好，手榴彈又好，罰球斬上去又好，呢啲一路都耍家，令我哋可以維持落去。

Q：賓福特今季無數次遇強愈強，如果揀一場至今代表作，會係邊場？
好多場都好難忘，無耐之前對白禮頓（3:3）嗰場，我覺得係典型賓福特嘅波，控球比例同傳球次數都低，射門亦唔多，但入到3球。係典型以小博大，同蚊型球會球員質素未必真係好好情況下，點樣同勁旅周旋。另外一場係上季對利物浦3:3嗰場，係好多人點解開始對賓福特有印象。至於今季贏過利物浦（3:1），其實喺上半場已經4次放個波入網，但只係2:0，有兩次唔知越位定咩，但打到利物浦落花流水，完全係唔夠砌。但冇辦法，如果真係揀一場代表作，一定揀返贏曼聯4:0嗰場，不過踢到最好都係頭先講對白禮頓嗰一場，比較深刻。

Q：如果揀球隊本季暫時最出色一人，會揀邊個？
東尼相對地多人熟識，佢亦都順利攞到佢第1頂喼帽，佢亦係受歡迎，啲爛仔波好睇。但係我覺得最出色係龍門拉也，因為佢嘅撲救次數係全英超最高，冇記錯高過第2位好多。佢喺以前英冠嘅時候位置感好差，有時接兩邊高空波都危危乎，但係見到佢上英超後愈嚟愈進步。

Q：對於爭歐洲賽信心如何？
唔好啦，以我哋隊波規模，爭到打歐洲賽未必係好事。你見到韋斯咸咁，上季都好哋哋，今季搞到喺聯賽都危危乎。對我嚟講反而覺得爭到就爭，但爭到都唔好擺咁多focus喺歐洲賽度。事實亦都係難嘅，我覺得白禮頓，同埋近期個勢好好嘅阿士東維拉都比我哋更有機會。

Q：球迷會未來有咩活動？
都唔敢搞啲咩住，其實之前做咗第2次嘅波衫團購，搞咗好耐唔知啲波衫飛咗去邊；過咗個幾月，我都畀咗好幾千蚊落去，一心搞退款，賓福特嗰邊搵咗間物流公司，間物流公司又搵另一間物流公司，搞到成件事好複雜……等下等下，啲貨就非常神奇咁嚟咗。英國嗰邊啲人做嘢相對「𥹉懦」，一出事就難搞，所以都唔敢搞咩活動住，亦都可以話喺香港嘅hardcore球迷唔多。若果隊波喺英超stay多幾年，可能搞啲聚會或者睇波活動。

Q：可否推介一個與你們友好的本地球迷會/群組？
唯一有喺我哋個page留過言嘅，係紐卡素其中一個fan club/page，叫「紐迷同好會」。據我所知喺香港嘅紐卡素球迷都多，不同fan club同page都唔少。

相關文章：
【球迷會請入】香港多蒙特球迷：平常心睇爭霸
https://sports.now.com/home/news/details?id=38357300105

【球迷會請入】「我可能係香港唯一布力般球迷……」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

安官古宴客後入波 車仔5蛋贈摩甘比

6分鐘前

史洛：喜歡阿奴今天的表現

1小時前

基艾沙開齋 紅軍4：0炒阿克寧頓晉級

2小時前

「不再有紅色」 阿仙奴全白戰衣迎曼聯

3小時前

莫耶斯「愛」回家：保住英超位進駐新球場

7小時前