【球迷會請入】香港多蒙特球迷：平常心睇爭霸

【Now Sports】冇賀蘭，有何難？多蒙特今季流失王牌射手，難得更緊咬拜仁慕尼黑不放，與死敵叮噹馬頭。蜜蜂躉點睇爭霸？且細聽多蒙特香港官方球迷會代表的看法。

Q：可否簡介一下你們球迷會？
我哋喺2014年尾成立，係香港唯一獲多蒙特官方認可嘅球迷會，希望凝聚香港嘅多蒙特球迷，畀佢哋一個平台去認識其他球迷，同討論球會相關嘅最新消息。歷年合共有約300名會員，年齡層頗廣闊，10幾歲至40幾歲都有。另外，我哋仲有男子足球隊，聚集咗對多蒙特及足球都非常有熱誠嘅球迷。我哋同其他球迷會、本地球隊不定期舉行友誼賽，亦間中參與聯賽。

Q：當初成立球迷會有何困難？
主要困難有兩個：第一，無論喺德甲聯賽本身定多蒙特都好，Fanbase都比較細，所以活動號召力有限；第二，當時官方比較著眼德國當地市場，更遑論拓展亞洲市場，所以對球迷會嘅支援並唔多。以前無論係訂購球會精品，抑或買賽事門票等都非常困難，要吸引球迷加入球迷會都比較有難度。不過，近年球會留意到世界各地都有唔少多蒙特球迷，亦開始著眼亞洲市場，所以開始多咗揀亞洲地區做球隊summer/legends tour嘅目的地，甚至有啲特別安排畀球迷會，例如優先安排門票等。

Q：今季流失賀蘭，反而比之前更咬住拜仁唔放，點評論球隊本季至今表現？
球隊表現穩定，少咗以一名球員為重心，反而等唔同球員都有機會發揮。當然喺大戰嘅時候，心理質素始終有待提升，尤其落後嘅時候就自亂陣腳，繼而冇辦法扭轉局勢，呢個係球隊多年嚟弱點。

Q：如果要揀球隊本季最出色一人，係邊個？
會揀祖利安白蘭治（Julian Brandt），之前佢嘅表現有啲低迷，但係呢1、2季終於打返起，今季表現更為突出，佢嘅助攻同入球數字，都比絕大部份球員高。

Q：對於爭霸信心如何？
有信心，只要球隊保持穩定發揮同心理質素就有機會。除咗樂觀之外，當然都會保持平常心，無論最終結果如何都繼續支持。

Q：球迷會未來有咩活動？
實體活動未必有好多，畢竟依家德甲喺香港冇合法轉播，冇辦法好似以前咁搞到睇波活動。喺呢段時間，希望集中發展網上活動，例如持續更新社交媒體，以及喺一啲會員限定渠道（例如group chat）同佢哋保持溝通。遲啲有機會都會搞聯誼活動，以及參與球迷會聯會活動，畢竟多年嚟同其他友會都有聯絡，大家都非常supportive。

Q：可否推介一個與你們友好的本地球迷會/群組？
白禮頓香港球迷會。

相關文章：
【球迷會請入】「我可能係香港唯一布力般球迷……」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

【世盃‧奇趣】拿高士文補召韋赫奧高開口問：有冇醉？

2026/06/12 00:22

ICD「救命」已出院 艾歷臣拒談掛靴

2026/06/09 10:38

【德甲博聞】成語動畫「狼」：唇亡齒寒

2026/06/03 08:24

禾夫斯堡29年來首降班

2026/05/26 11:19

成「仁」在即？拜仁總監：已跟哥頓展開對話

2026/05/24 20:29