【球迷會請入】「我可能係香港唯一布力般球迷……」

【Now Sports】布力般流浪，英超元祖球會、曾經勁到癲嘅前英超盟主，周五與同為爭升上英超衝刺的諾域治對撼。在香港，多得幾個有心人由當年情人節嘅「玫瑰約定」到成立香港布力般流浪球迷會，撐愛隊並以球會友，更有布迷親赴英倫觀看周五之戰。睇完今次【球迷會請入】，布迷肯定為「我唔係香港唯一布力般球迷」心感興奮！

問：可否簡介一下你哋球迷會？
「我可能係香港唯一布力般球迷」，可能係每一個香港布迷有諗過嘅嘢，其實早於千禧前後Newsgroup盛行時都聚過一班布迷，可惜係睇過幾次波之後就失聯，慢慢就各散東西。直至2014年，我哋有三個香港布迷，喺英國布力般嘅Fb group 認識，喺網上傾下波經，直到喺當年嘅情人節決定約出嚟睇波！

能夠喺情人節捨另一半一齊睇布力般比賽，呢份仲唔係真愛？！

所以我哋決定成立香港布力般流浪球迷會，建立自己嘅WhatsApp Group同 Signal Group，甚至喺2018年開啟Fb page 同IG向香港人推廣布力般。

問：成立目標係咩？
對內，作為布迷之間橋樑，我哋成立嘅目標就係希望嗰啲，曾經以為「我可能係香港唯一布力般球迷」相認，可以畀一個平台大家話當年，又可以傾下布力般波經；對外，我哋係2018年組成一支球迷會足球隊，目標係「以球會友」，除咗一班布迷聚埋踢波之餘，我哋仲希望藉此機會同其他球迷會一齊友賽切磋，慢慢擴大球迷會嘅圈子。

喺舊年，我哋仲開咗個英冠以下嘅低組別球迷會Signal Group，希望畀一啲撐開低組別球會嘅球迷一個機會，與同好傾波下經。離開英超超過十年，布力般都慢慢離開大家嘅視線，大家都仲停留係「舒利亞瑟頓」、「暴力般」嘅印象，有啲新生代嘅球迷，甚至唔知道布力般贏過英超。我哋建立Fb 專頁嘅目的，並唔想係圍爐取暖，反而希望利用「香港布迷」呢個身份同大家同行，除咗同啲老球迷話當年，亦希望用唔同方向同手法，畀新球迷認識布力般呢隊波。除咗介紹球會消息，我哋更希望立體咁講布力般，集中去搵一啲新舊球員同各地布力般球迷小故事分享畀大家，喺佢哋嘅角度去睇呢間球會，了解一下佢哋點解咁多隊唔捧，而去捧布力般。我哋相信，從每一個由布力般衍生出嚟嘅故事入面，都會睇到好多人情世故，希望可以保育到呢個時代嘅記憶同人情。

同埋我哋都希望利用呢個平台，介紹一班喺香港出生而去英國球壇追夢嘅球員，例如踢緊布力般青年軍嘅慈英，同史篤城女子隊嘅陳頌文、林裕殷，等大家支持佢哋，同跟進佢哋嘅發展近況。

問：布力般係英冠隊，人氣唔及歐洲主流班霸，當初成立球迷會有咩困難？
唔好講話十年未重返英超，其實自捧盃之後經歷3次降班，甚至跌到英甲，我哋相信到依家仍然不離不棄嘅堅係真布迷！咁當然要搵到呢班真布迷，如果冇科技幫手，球迷會絕對唔會成立到。自從我哋2014年喺英國布力般嘅Fb group 搵到香港布迷之後，就係呢啲Fb group 逐個英文姓氏係咁搵，逐個pm佢哋，逐個拉佢哋入group，都花咗唔少時間同心機。

我哋心知人數一定唔會多，但搵到一個多一個，令以為「我可能係香港唯一布力般球迷」嘅佢哋，覺得唔孤單，有人同你一齊撐㗎！

問：目前球迷會規模係點？
相比其他球迷會，我哋人數唔算多，大概有70人，而活躍既骨幹成員有十幾個，近年開始有啲都移民外地，所以我哋都好珍惜每一次搞活動嘅機會。縱然係咁，布迷勝在夠團結，無論由搞睇波活動嘅場地、約友會搞友賽搵場地聯絡、營運專頁嘅文章同拍片，到之前製作節目，每一個布迷都各司其職，發揮自己嘅能力，人雖少，但能量發放得好大！

我哋都係一班自布力般1994/95年捧盃之後，就支持球隊嘅布迷，有啲更係自1992年升上剛成立嘅英超就開始支持，大大話話撐咗30年，由當年嘅學生，到依家有家庭有小朋友嘅中佬。不過喺我哋球迷會入面，都有一啲年輕嘅90後布迷，佢哋都係因為千禧年後，摩頓柏達臣同森巴嘅「暴力般時代」開始追捧。

問：聯賽去到最後直路，點評論球隊本季至今表現？
今季表現超出大部份布迷預期。球會改革管理模式，增設足球總監，負責轉會、合約、球員分析、球探、醫療等等訓練以外事務；而季前請到湯馬臣呢個領隊，之前未有英倫球會帶波經驗，加上有唔少主力免簽離開，我哋預期都係護級線上、附加賽線下。截稿前仲喺頭6名，係意外驚喜。

問：如果揀本季最出色嘅一位，係邊個？
中堅Dominic Hyam，最近仲後補入選蘇格蘭代表隊，季初由高雲地利加盟，算係好能夠接替離隊他投米杜士堡嘅蘭尼漢，佢發揮穩定，亦係球隊嘅副隊長。

問：爭升班信心如何？
作為球迷當然希望球隊能夠重返英超，但同時好清楚球隊現時實力。唔少英冠強權如列斯聯或賓福特，都唔係一次附加賽就升到班。依家布力般陣容年輕，冇夠份量嘅老大哥壓場，順境波通常發揮理想，先落後多數輸波收場，咁嘅心理質素恐難應付附加賽嘅心理壓力。若能進入附加賽，只望球隊能夠踢好每一場，踢成點已唔敢多想。

問：點睇今日對諾域治嘅關鍵大戰（第6對第7位）？
布力般主場比較可靠，上場作客輸俾伯明翰，球隊上下心有不甘，喺主場球迷面對定必搏盡；但對於對方嚟講，今場如果喺伊活敗陣差不多無緣附加賽，一樣毫無保留，估計會和波。

問：球迷會嚟緊有咩活動？
繼續「以球會友」嘅方向搞活動，除咗同各球迷會踢友賽之外，都希望可以搞多啲跨球迷會睇波團，今季我哋都成功同米杜士堡、新特蘭、卡迪夫城同史雲斯球迷一齊睇波，打下牙骹戰一齊互動，氣氛相當熱烈！因為我哋相信獨樂樂不如眾樂樂，能夠一齊玩、一齊識朋友、一齊傾波經，先係搞球迷會最好玩之處。

Q：可否推介一個同你哋友好嘅本地球迷會/群組？
如果以球迷會足球隊嚟講，我哋同香港米蘭FC 既關係好好，皆因4年前佢哋係第一隊搵我哋踢球迷會友賽，開啟咗我哋球迷會之間比賽嘅大門，至今都係鐵腳之一。
而係球迷會專頁上，我哋就同李斯特城球迷會比較多來往，可能大家都係神奇攞過英超，同埋有一位好愛球會嘅班主，所以特別惺惺相惜。

【編按：布迷親赴英國觀看周五布力般大戰諾域治，有興趣追蹤可瀏覽香港布力般流浪球迷會 HKBRSC官方Facebook與Instagram。】


【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

為顯忠誠不脫「魔」 般奴自比托迪

1小時前

【FPL戰術室】隊長人選「幸福的煩惱」

3小時前

加士拿：4個U21球員踢到抽筋

4小時前

節日快車嚟啦！誰當主角？

6小時前

當拿隆馬盼跟隨哥迪奧拿長留藍月

13小時前