【球迷會請入】維拉球迷：我哋睇住加利殊大

【Now Sports】2023香港足球會七人足球賽今日開打，相信不少球迷記得英格蘭球星加利殊當年兩度隨阿士東維拉訪港，在賽事發亮發熱。且細聽多次接受本網站訪問的香港維拉球迷會主席Kidd，大談巨星如何崛起，以及艾馬利本季如何令球隊脫胎換骨。

Q：七人賽開打，知你一直有留意呢個賽事，可否分享一下當年點滴，例如加利殊訪港情況？今屆賽事有咩睇頭？
阿Jack（Jack Grealish，加利殊），我哋真係青年軍睇到佢大，佢當年（2013及14年）嚟香港參加七人賽，之前亦已經開始出名，因為之前維拉贏過Next Generation Cup，你可以當係青年版歐聯前身，當年佢都唔算擔大旗，但已經多人留意佢嘅表現。後嚟佢喺香港，憑一人之力，加上技術出眾又靚仔，當然受歡迎。可以咁講，我哋由細睇到佢大。
香港球迷睇七人賽，最想睇一個扭幾個，加利殊絕對係呢一類型球員，從而吸納到一班香港球迷。我哋亦透過七人賽，更加了解球會有咩超新星誕生。今季有好多未來球星，好可惜Rory Wilson因為參加歐洲U17錦標賽無嚟香港。

Q：可否簡介一下你哋球迷會？
喺2011年未成立球迷會之前，我哋都好個人化，冇一個特定組織，就算有都可能係外地人。嗰年香港舉行英超挑戰盃，維拉官方舉辦咗個活動，咁啱我參加咗遊戲，可以入大球場睇training section，就喺嗰次識咗幾個本地維拉球迷，大家交換contact就成立咗個group，之後就搞咗香港維拉球迷會。之前都有講過有個外國人成立官方嘅Lions Club，但嗰個唔夠香港化，冇人知道呢個club，亦冇人join，而我哋見維拉喺我哋年代都有自己嘅球迷，同埋都有歷史底蘊，所以吸納咗一班老球迷，從而我哋成立一個屬於local嘅球迷會。
Lions Club個會長都唔係香港人，之後佢返英國，佢推薦我成為官方球迷會主席。即係除咗fb個香港維拉球迷會，我都係Lions Club嗰邊主席。我哋將兩邊做接駁位，外國人通常用email聯絡我。疫情前，維拉官方大使伊恩泰萊每年都會嚟香港同球迷會聚會。

Q：維拉近年起起伏伏，維繫球迷會有冇困難？
維拉曾經降班，反而覺得呢件事令球迷更加團結，做勝利球迷好易，當球迷冇成績、降班，自然會流失勝利球迷。維拉都喺英冠浮沉2、3年，慶幸呢班球迷不離不棄，反而降班係一件好事，球會方針改變，因為降班前球會架構幾混亂，財政亦唔太穩健。降班後換咗班主，令架構健全啲，令球會有好嘅將來。一班球迷經過低潮，令我哋更團結。

Q：艾馬利令球隊脫胎換骨，你認為佢令隊波最大改變係咩？
最主要令後防更穩固，其實喺謝拉特，甚至之前嘅甸史密夫年代防守都比較鬆散，艾馬利上場後防守專注度有所提升；以前失球後，隊波會混亂，但依家就算失球都唔會有呢樣嘢發生，而呢大半季，維拉被反勝嘅情況少好多。
陣式上，依家踢緊話就話係傳統嘅4-5-1，嚴格嚟講係6-3-1，你見到兩翼好多時都返嚟防守，艾馬利不嬲以防守行先，紀律度亦唔錯，兩隻翼防守參與度多咗，庇利以前好懶，唔會返嚟，布安迪亞亦都係。依家一條心返嚟防守，所以維拉失球數字少咗。

Q：球迷會嚟緊有咩活動？
主要都係七人賽比賽，我都同官方聯絡咗，可以畀香港維拉球迷睇維拉青年軍練波。

Q：可否推介一個與你哋友好嘅本地球迷會/群組？
諾定咸森林香港球迷會。

相關文章：
【球迷會請入】紐卡素球迷會：煞科戰打邊爐睇波
https://sports.now.com/home/news/details?id=38582838465
【球迷會請入】帕爾馬球迷：我哋有咩未經歷過？
https://sports.now.com/home/other/details?id=38538818560
【球迷會請入】白禮頓球迷：好有信心進軍歐洲
https://sports.now.com/home/news/details?id=38494029616
【球迷會請入】AC米蘭球迷：歐聯入決賽一定大搞睇波
https://sports.now.com/home/other/details?id=38444516918
【球迷會請入】賓福特香港球迷會：贏曼聯4：0收穫大
https://sports.now.com/home/news/details?id=38403816700
【球迷會請入】香港多蒙特球迷：平常心睇爭霸
https://sports.now.com/home/news/details?id=38357300105
【球迷會請入】「我可能係香港唯一布力般球迷......」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

為顯忠誠不脫「魔」 般奴自比托迪

1小時前

【FPL戰術室】隊長人選「幸福的煩惱」

4小時前

加士拿：4個U21球員踢到抽筋

4小時前

節日快車嚟啦！誰當主角？

6小時前

當拿隆馬盼跟隨哥迪奧拿長留藍月

14小時前