【球迷會請入】白禮頓球迷：好有信心進軍歐洲

【Now Sports】白禮特剛於英超絕殺兼雙殺曼聯，暫列第6勁爆！難怪白禮頓香港球迷會代表，對愛隊進軍歐洲信心爆棚。

Q：可否簡介一下你哋球迷會？
我哋喺2018年由部份喺白禮頓讀書嘅球迷創立，希望令到多啲人認識白禮頓呢個城市同埋球隊。現時規模集中喺Facebook、Instagram同Signal。呢3個平台都有群組同專頁，亦都獲得官方認證成為亞洲地區唯一官方球迷會。長駐喺英國嘅成員就係季票成員，亦都有搞唔同嘅睇波活動畀移民去英國嘅香港人。
喺年齡層方面，相比起傳統Big 6球隊，我哋嘅球迷相對年輕。球會崛起比較遲，亦都係2017年先升到班，老一輩嘅球迷相對較少，大部份都係近年因出國讀書、移民先畀白禮頓嘅地區感情。近兩季由迪些比同波特執教，改用主控棄用傳統英式踢法後，吸引不少球迷欣賞，而擊敗幾隊傳統Big 6後，令更多球迷開始觀看白禮頓比賽，繼而成為球迷。

Q：白禮頓人氣唔及歐洲主流班霸，但見你哋FB唔少追隨者，當初成立球迷會經過有何困難？
我哋升班不過5、6季，喺最初好難受注目，尤其係啲香港時間嘅深夜比賽就更少人留意，而且我哋分別有香港同英國成員，喺初時溝通其實因時差而感到困難。加上好多時現場睇波嘅成員未必能即時直播，所以需要靠香港嘅成員通宵做文字直播，希望可以同球迷直接喺社交媒體上互動。
另外我哋都覺得好好彩，白禮頓呢隊波吸引咗唔少喺白禮頓嘅香港留學生關注，即使好多畢業生都會繼續關注球隊動向。另外，近年球迷會亦開始參與白禮頓本地社區活動，慢慢令到更加多移民當地嘅香港人，了解白禮頓同本身城市嘅吸引力。伴隨呢兩季成績有進步，同更多香港球迷親身參與球會活動，變相令到話題同參與度增加。

Q：今季戰績令人激讚，原因何在？
我哋喺球員買賣上嘅處理相對較好，相比喺部份球隊有更加長遠方向同戰術踢法。呢點係喺呢幾季嘅累積，加上傳統強隊今季表現有少少失準。今季成績對於球會同班主嚟講係長期投資嘅回報，同時亦反映喺財務報表上面：我哋升班後第一次係正回報。

Q：如果揀一場今季代表作，會係邊一場？
如果只揀一場，確實好難去選擇，因為今季有好多場比賽都踢得唔錯，但最好嘅比賽一定係未踢嘅下一場！我哋永遠對未來有信心。

Q：如果揀本季暫時最出色嘅球員，會揀邊個？
我哋覺得係摩西斯卡斯度（Moises Caicedo），喺搶截同奪回控球權嘅表現都極具信心，作為中場嘅佢亦都有遠射能力。雖然今季中出現過一啲轉會消息，不過之後佢踢嘅比賽都搏盡，唔錫身嘅表現，俘虜咗我哋球迷嘅心。今季佢多次攞到MOTM，絕對係本季暫時最出色嘅球員。喺世界盃後，三笘薰嘅表現亦都為佢帶嚟唔少球迷欣賞，佢亦都係呢半季發揮得上佳嘅一人。

Q：對於爭歐洲賽資格信心如何？
我哋嘅信心非常強，但唔同嘅對手亦都喺季尾直路加力，我哋需要把握好對主要爭6對手嘅比賽，去盡力拎到歐洲賽席位。

Q：球迷會未來有咩活動？
我哋以前有搞過團購，或者開直播交流，依家都有Signal群組畀大家對比賽或關於白禮頓嘅消息交流。未來主要嘅活動都會喺英國，包括搞睇波團聚等等。喺香港就要視乎香港方面球迷嘅需求，或者喺港會7人賽入面都會帶到驚喜畀香港球迷，但要同球會方面做少少溝通工作。

Q：可否推介同你哋友好嘅本地球迷會/群組？點解？
香港紐卡素球迷會、Borussia Dortmund Official Fanclub Hong Kong同鎚仔幫主場。當年我哋同紐卡素一齊升班，估唔到多年嚟大家都一直愈踢愈好。多蒙特球迷會嘅一名成員係其中一個版主嘅小學同學，亦係佢帶我入咗足球呢個坑入面。至於鎚仔幫主場係一個早年白禮頓青年軍嚟香港參加五人足球比賽時認識。

相關文章：
【球迷會請入】AC米蘭球迷：歐聯入決賽一定大搞睇波
https://sports.now.com/home/other/details?id=38444516918

【球迷會請入】賓福特香港球迷會：贏曼聯4：0收穫大
https://sports.now.com/home/news/details?id=38403816700

【球迷會請入】香港多蒙特球迷：平常心睇爭霸
https://sports.now.com/home/news/details?id=38357300105

【球迷會請入】「我可能係香港唯一布力般球迷......」
https://sports.now.com/home/news/details?id=38300493733

【球迷會請入】逢周五上載
各球迷會與群組，若想分享你們的故事與活動，不妨電郵：
ballthirteen@hotmail.com

星期一 【足二代】
星期二 【體壇歪人】
星期三 【英超知音人】/【蹴吧！日韓】
星期四 【女足豪傑】
星期五 【球迷會請入】

巴拿特：沙卡提升黑貓水平

7分鐘前

留「城」借場練波 安祖斯乘機邀「哥」？

3小時前

為顯忠誠不脫「魔」 般奴自比托迪

5小時前

【FPL戰術室】隊長人選「幸福的煩惱」

7小時前

加士拿：4個U21球員踢到抽筋

8小時前