【球迷會請入】熱刺香港：有力與曼城一戰

【Now Sports】今輪英超重頭戲當數曼城迎擊熱刺，今次請來熱刺香港Lilywhite HK代表分析這場大戰，大致認為失球難免，但對前線有信心，深信有力一戰。

Q：熱刺下周日大戰曼城，勝算如何？估計勝負關鍵何在？
熱刺近期傷兵有增無減，後防更因為副隊長中堅基斯頓羅美路停賽、新加盟主力中堅雲迪芬受傷，導致上仗對阿士東維拉需要擺出4閘後防。相信呢個問題喺作客曼城時將持續，所以後防失波會係預算之中，勝負關鍵就在於前線能唔能夠把握到入球。
球隊發電機占士麥迪臣雖然因傷無法上陣，但熱刺攻勢依然強勁，可惜嘅係孫興慜上場雖然3次送球入網，但最後都被VAR推翻。相信如果今場熱刺前線能夠有好嘅把握力，就算作客曼城仍有力一戰。

Q：哈利簡尼離隊，球隊季初氣勢如虹，近期明顯下滑，你們認為原因是甚麼？
熱刺史上最佳射手簡尼離隊，當然對球隊進攻有巨大影響，大部份球迷預期熱刺陷入一輪啞火陣痛期。尤幸新領隊及新球員皆能快速融入，新戰術下每人多走一步，攻力不減反增，不過近期前中後場均有不少主力球員經歷傷病停賽，導致戰績下滑，希望後備球員可以把握上陣時間踢出身價，繼續踢出漂亮進攻足球。另一影響最大的原因，我哋認為舊有球員對保守踢法太過根深蒂固，未能快速適應樸帥嘅進攻踢法，導致主力球員傷出後無辦法保持一開始嘅表現。

Q：如何評價領隊樸斯迪哥高奧至今的領軍表現？
神奇，頂級，超卓！正如剛才所講，本來大部份球迷對陣痛期已經有一定心理準備，甚至喺樸斯迪哥高奧未上任前已經有聲音希望佢唔好加盟熱刺。如果有人同你講熱刺喺第10周嘅時候會排喺英超榜首，相信你會笑住咁同佢講唔好發夢，但係樸斯迪哥高奧表現出色，喺頭10場英超比賽錄得8勝2和佳績，而且連續3個月獲得最佳領隊獎項，相信好多球迷都預計唔到有咁靚嘅開局。
雖然近3場比賽球隊狀態有所回落，但並冇影響我哋對佢嘅信心，相信熱刺只要繼續堅持踢法，入球同埋分數將陸續有來。

Q：孫興慜在亞洲一直受歡迎，你們估計他今季英超最後可入幾多球？
孫興慜喺英超13場比賽中已經獲得8個入球，我哋相信只要佢今季能夠繼續健康上陣，20球以上絕對不成問題。

Q：對球隊爭入前4信心如何？
我哋對今季球隊排名進入前4，重返歐聯舞台暫時仍然審慎樂觀。雖然球隊近況下滑連輸3場，但唔難喺訪問中睇出團隊入面，大家都渴求勝利，球員亦希望可以盡快重回正軌。我哋只係距離第4位球隊（阿士東維拉）兩分，絕對係一個可以追嘅位置。

Q：可否簡介你們球迷會/群組？
我哋熱刺香港Lilywhite HK成立於2015年，Facebook專頁旨在聚集一眾香港熱刺球迷，作球會資訊集散渠道，與一眾球迷理性討論，依家大約有7000個followers，同時亦有Facebook吹水谷同Whatsapp谷畀球迷交流。雖然我哋一眾admins都各有各忙，大家亦由當初喺社會初出茅廬嘅後生仔到依家各自結婚、生仔、移民，但係大家仍然盡量每日都update專頁，希望畀一眾熱刺球迷睇到最新嘅球會資訊同傳聞。開心嘅係我哋都依靠呢個渠道識咗唔少好朋友，喜酒都飲過唔少餐，所以都要多謝熱刺連繫咗我哋呢一班有共同興趣嘅球迷。

Q：與熱刺官方或者其他熱刺球會群組有沒有任何聯繫？
我哋同香港熱刺官方球迷會Spurs HK分屬友會，一眾球迷閒時都會去Spurs HK專屬嘅灣仔Taboo餐廳睇熱刺比賽。

Q：為會友籌組過哪些活動？
疫情前我哋都搞過唔少睇波活動，當年歐聯決賽，我哋搞過逾百人嘅睇波活動，但係疫情後真係較少機會可以再搞咁大型嘅活動。依家主要嘅活動係同球迷定期出嚟圍內踢波，同時亦有一隊球隊，參與香港球迷會聯賽，畀球迷有機會參與輕鬆嘅球聚，同時都有機會參與有競爭嘅比賽。

Q：可否推介與你們友好的本地球迷會或群組？
同我哋比較多交流嘅球迷會，都係一眾球迷會聯賽嘅參賽球隊，包括巴塞香港官方球迷會、香港紐卡素球迷會、皇家馬德里香港官方球迷會、香港利物浦官方球迷會、Milan Fans Club（MFC）、祖雲達斯香港球迷會同埋曼聯官方球迷會，大家都可以喺Youtube同Facebook多多留意「香港球迷會聯賽 Hong Kong Supporters' Club Football League」。

相關文章：
【球迷會請入】日本隊香港球迷會：上田係亞洲盃首席中鋒
https://sports.now.com/home/news/details?id=38866088790
【球迷會請入】「巴」「皇」躉齊貼愛隊贏2：1
https://sports.now.com/home/news/details?id=38860555972
【球迷會請入】般尼從來不易！
https://sports.now.com/home/news/details?id=38858783508
【球迷會請入】國米躉：杜林可能一季入20球
https://sports.now.com/home/news/details?id=38855185797
【球迷會請入】棒球大聯盟：上屆港隊已不再捱打
https://sports.now.com/home/news/details?id=38852821552
【球迷會請入】拿玻里躉：快啲搞搞條防線！
https://sports.now.com/home/news/details?id=38850680695
【球迷會請入】德友：為重召湯馬士梅拿驚訝
https://sports.now.com/home/news/details?id=38848258625

【球迷會請入】逢隔周五上載。歡迎各球迷會與群組分享你們的故事與活動，不妨到「球十三」fb專頁留言。

巴拿特：沙卡提升黑貓水平

1小時前

留「城」借場練波 安祖斯乘機邀「哥」？

5小時前

為顯忠誠不脫「魔」 般奴自比托迪

6小時前

【FPL戰術室】隊長人選「幸福的煩惱」

9小時前

加士拿：4個U21球員踢到抽筋

9小時前