【球迷會請入】「巴」「皇」躉齊貼愛隊贏2：1

【Now Sports】西甲國家打吡明晚爆發，sports.now.com特別邀請巴塞香港球迷會、皇家馬德里香港球迷會的會長先在網上舌戰一番，兩人都撐愛隊以2:1獲勝。

June（皇家馬德里香港球迷會）
Alan（巴塞香港球迷會會長）

問：兩個請講覺得愛隊贏波嘅理由？
June：今次有機會贏，係因為隊波呢排近況麻麻，次次麻麻哋去踢打吡會精神啲啲，睇到比寧咸、雲尼素斯開始踢到啲form出嚟，頭幾場覺得佢哋只係靠個人能力，近期雖然見到後防薄弱，但係見到佢哋前線有少少組織，所以希望有啲驚喜。
Alan：首先係因為愛！而主場之利都係一個原因，雖然June話佢哋作客反而贏到巴塞，但我又覺得主場會有優勢，另外加上沙維呢幾次主場帶隊踢國家打吡都力克皇馬，所以今次就算傷兵滿營，我哋都有信心可以攞3分。
June：如果安察洛堤唔係出怪陣就穩陣啲，佢次次對馬德里體育會、巴塞出一啲奇怪嘢就會衰。

問：比寧咸大爆發原因係咩？
June：其實我冇咩睇佢喺多仔（多蒙特）嘅表現，佢大爆發可能因為冇咗賓斯馬，多咗啲空位同埋對方死嘜住前面兩個。見到我哋箭頭開頭冇咩入波，佢反而突出，啲撞射、one-two就入到波。同埋佢個人能力好強，見啲人拉佢都拉唔跌，就算跌都護到波起番身，抗壓性都幾強，而把握力都幾好。

問：估計巴塞點樣抵擋比寧咸，有咩部署？
Alan：相信沙維同教練團隊都留意到，佢的確係當紅人物，狀態好好係事實。不過巴塞一向好少人盯人，尤其係傷兵好多，法基迪莊同柏迪出唔出到都成問題，好難搵專人應付比寧咸，所以會忠於自己風格，相信球隊用番短傳同逼搶。如果後防線達標，應該有能力鎮壓到佢。

問：皇馬今季戰術上有咩改變？
June：我覺得佢哋踢緊啲組織，好似啱啱場歐聯對布拉加，可以見到費達歷高華維迪一踢上前，雲尼就會跑一段路之後傳中，打多咗類似啲快攻。之前中場嘅卻奧斯、摩迪傳球準但速度相對慢，依家見到隊波做多咗快攻組織，所以卻奧斯同摩迪好少同時出現，始終需要一個傳到波同hold到中場，但如果兩個同時落場隊波就會慢。

問：球迷仲有冇掛住賓斯馬？
June：其實都有，我哋冇成日提起但有留意佢喺沙特阿拉伯踢成點。不過因為有比寧咸，啲人貪新忘舊（Alan即時指手劃腳，插口笑說「呢個會長都係」）。我哋最近搞波衫團購，十件有九件都印比寧咸。講番轉頭，當年基斯坦奴朗拿度走咗第一年都仲有人印佢波衫，但賓斯馬就少。

問：點睇巴塞啱啱入波嘅基奧？
Alan：嗰日我哋見證佢絕殺畢爾包，不過所有巴迷都諗佢得17歲，唔希望畀太大壓力佢，始終拉馬西亞出咁多青訓，周不時會出一兩個好亮眼，但之後又冇咗影，真係成功到好似美斯、沙維、恩尼斯達嗰啲其實寥寥可數。希望佢喺沙維帶領下慢慢健康成長，太過focus佢就會變咗另一個法迪。

問：法迪似乎喺白禮頓站穩陣腳，估計佢仲有機會回頭嗎？
Alan：我哋都希望法迪可以回復初出道時嘅水準，尤其重建自信，期待白禮頓領隊迪些比嘅調教，有表現絕對歡迎佢返嚟。始終好多巴塞球迷對青訓有一份情意結，我哋都希望每一個青訓球員喺每個地方、每一個崗位都可以成功。

問：巴塞今次會著Rolling Stones波衫，球迷有咩評價？
Alan：呢件好嘢嚟吖！唔止Rolling Stones，之前同兩三個組織合作過，其實冇咩問題，國家打吡大家當助興下、fashion show。仲有最緊要可以幫巴塞賺多啲錢出糧。巴塞之前出Rolling Stones產品，一出就賣晒，啲人可能都好鍾意Rolling Stones。睇下幾時出埋Mirror！
June：我哋一開始見到都覺得幾得意，唔知球員對住呢件波衫會唔會忍唔住笑？

問：你哋估嘅最後比數係咩？邊個球員會先入波？
June：我估2:1，好似近排贏親都係2:1。我估後衛會入波。希望贏，就算輸都唔好咁核突，因為次次輸親都好鬼核突。（Alan展示五隻手指示意2018年巴塞大勝5:1）
Alan：我都係估贏2:1，講真以依家人腳，我相信巴塞冇咩能力可以大炒到，呢個係事實，有得贏就算。至於入球者，依家連邊個出得都未知，假設冇利雲度夫斯基、法基迪莊、柏迪，我覺得可能係祖奧菲力斯。

問：祖奧菲力斯喺巴塞發展唔錯……
Alan：初時巴塞話借佢番嚟，我哋有啲巴迷都唔睇好，但估唔到呢幾場波完全融入到巴塞嘅體系，亦都諗唔到佢同隊友有咁大化學作用，尤其佢同利雲頭幾場啲one-two同no look pass，你真係估佢唔到。喺馬體會見唔到佢呢啲嘢出現，你唔知以為佢係巴塞青訓出身。不過佢呢幾場腳風冇咁順，對畢爾包都中楣，或者國家打吡大家踢爭氣波，對佢有期望。

問：皇馬驚菲力斯嗎？
June：佢好少對我哋入波（兩人齊大笑，Alan插咀說「馬體會成日被皇馬恰住」），馬體會入我哋最多波應該係摩拉達。

問：今場國家打吡喺香港時間22:15開波，你哋各自有冇睇波活動？
June：我哋同西甲會喺中環海濱旁邊，摩天輪下面一個露天地方搞睇波活動，我從未去過，係一個全新環境，好靚，希望到時唔好落雨。
Alan：西甲都有聯絡過我哋，問我哋有冇興趣以Party形式睇波，但因為我哋要開會員大會，所以另外喺銅鑼灣book咗場地睇波兼開會。

【編按：訪問完結前，兩人異口同聲推介大家留意香港上演的「國家打吡」，原來兩間球迷會將於周日在香港球迷會聯賽對撼……又是另一場龍爭虎鬥。】

巴塞香港球迷會
https://www.facebook.com/barcahongkongfanclub/

皇家馬德里香港球迷會
https://www.facebook.com/realmadridhkfc/

【西甲】巴塞隆拿VS皇家馬德里
Now TV 632台28/10 22:15直播
Now E 同步直播

【因稿件調動，原定下星期五上載的【球迷會請入】暫停一次】

相關文章：
【球迷會請入】般尼從來不易！
https://sports.now.com/home/news/details?id=38858783508
【球迷會請入】國米躉：杜林可能一季入20球
https://news.now.com/home/sports/player?newsId=sp38855185797
【球迷會請入】棒球大聯盟：上屆港隊已不再捱打 【亞運特別篇】
https://news.now.com/home/sports/player?newsId=sp38852821552
【球迷會請入】拿玻里躉：快啲搞搞條防線！
https://news.now.com/home/sports/player?newsId=sp38850680695
【球迷會請入】德友：為重召湯馬士梅拿驚訝
https://sports.now.com/home/news/details?id=38848258625

巴斯東尼無意入「塞」

18小時前

巴塞會長候選人：盡力斟美斯回巢

21小時前

王中王！美斯也馬3.27交鋒

21小時前

安巴比差1球平C朗紀錄

2025/12/18 18:19

【足室談心】球迷會朝聖之旅（上）

2025/12/18 17:24