【十三短打】卡域克回歸紅魔有福

【Now Sports】季中換帥，有咩好過搵熟悉球會嘅人回巢領軍更恰當？尤其呢個係卡域克。

卡域克（Michael Carrick）球員時代踢法硬橋硬馬，當然談唔上偶像級，但少說話多做事，又勝任中場、後衛，呢類實幹型球員又好難令人討厭。曼聯躉當然對4年幾前，蘇斯克查被炒，卡域克臨危受命短暫出任看守領隊記憶猶新。結果曼聯踢咗3場口碑載道嘅比賽，情況，就好似上季雲斯斯度萊一樣。

係嘅，佢熟悉曼聯內部運作，亦同陣中個別老臣子熟稔，仲有助教團隊亦不乏猛人，應該可以好快整頓隊波。

講番嗰季蘇B落台，同基斯坦奴朗拿度回歸絕對有關。C朗當然世無匹敵，但正因冇辦法唔以佢為重心，蘇B前幾年經營嘅年青化、無重心主義路線，散晒。印象最深刻係卡域克做替工期間大戰車路士，佢夠膽先收起C朗。萬人迷後備落場，一完場就直接走入球員通道，甚至冇留意卡域克想同佢擊掌。

卡域克當時叫外界唔好過份解讀，十三總覺得係一種表達，算係為前帥兼好友蘇B聊表心意。

費Sir之後，曼聯幾乎成為英雄塚，唔知卡域克由依家教到季尾結局會點，以佢領軍敢作敢為風格，或者，呢隻紅魔搵得番強勢時嘅DNA……少少都好。

最服卡域克，係曼徹斯特打吡在即，據講會即刻督師。曼城喎，已經返晒嚟，啱啱又作客砌低紐卡素，大敵當前得幾日備戰，換轉有啲領隊，或者會拖一拖，寧願先睇波唔即刻領軍出擊。當仁不讓，禮拜六頭場，一於睇卡域克台戲。

撰文：球十三
足球迷叫第十二人，冇偏愛，冷眼旁觀係十三。

曼聯季前賽壓軸鬥AC米蘭

16小時前

馬利斯卡回「城」未明朗 傳車仔索全額「分手費」

20小時前

巴西補選紅魔準新兵踢世盃

2026/06/08 02:17

艾馬利：維拉下季挑戰英超寶座

2026/06/06 12:09

史葛撐伊拉奧拿：利記可重拾「重金屬」

2026/06/06 12:09