【曾以行的足球路】亞運前後的反思（中）

【Now Sports】他笑言自己「很長氣」，細說完在傑志的故事後，盤口大開猛喝下幾口水，再為我們娓娓道來亞運的前後。

在舖墊亞運路前，往後回首U22亞洲盃外圍賽，曾以行欲言又止，指港隊在過程和結果中自己也難以接受，坦言不敢直視球衣上的徽章，當時感覺沒有顏面代表香港出賽，更是愧對球迷及香港人。

縱使Ellison大敗予烏茲別克0:10一役不在場上，在字裡行間都能感受到他的痛，他說：「嗰場對烏茲別克係因傷後備，坐係後備席都幾大無力感，其實好想落場出一分力，我當刻真係會責怪自己點解無準備好而令自己受傷，雖然大敗一場，我亦都唔會話有呢場波我就會唔同啲，唔想去discredit任何球員，因為我哋係一team人。」於言語間表達出對該場大敗自感羞恥：「咁樣輸波係一件好羞恥嘅事，係令呢個章、呢個地方嘅人失望，自己亦都好嬲，完場之後大家喺更衣室嘅氣氛好凝重，想快快脆離開球場，但我哋都會因為咁而痛，覺得呢個表現對唔住大家。」

Ellison坦言自己是U隊出身，此次出行也想改變過往U隊在球迷心目中比較負面的印象，「好想為自己，甚至為之後U23嘅師弟做返啲嘢，想今次踢返好啲用成績去為佢哋爭取返啲正面評價，可惜最尾做唔到。」

而且「安達臣好介意我哋係U22亞盃外嘅成績，3場比賽0入球失咗13球仲要包尾出局，佢好嬲，佢覺得唔能夠接受，要喺嚟緊嘅亞運有唔同」，安達臣決心之大令他備受感染。

港隊U23於首場亞運賽事看見真正的變化，Ellison謂：「第一場對老對手嘅烏茲別克，安達臣喺賽三番四次咁強調我哋唔可以再失咁多球波，後防唔可以再咁鬆散，又激勵我哋要做好啲，佢同我哋都想一雪前恥，雖然小組賽兩戰烏茲別克都係輸波但只係僅敗，所以安達臣都滿意我哋頭兩場比賽所展現出嘅戰鬥力。」

知恥近乎勇，尤其那段時間U隊接連大敗，大港腳的友賽成績未如理想，最後於亞運破紀錄闖4強奪得殿軍，對港隊而言是及時的反彈。

不過他坦言：「不論係亞運對住伊朗定日本都好，嗰種比賽強度係港超唔會有嘅，對手可以將嗰節奏由頭帶到尾，lead足90分鐘，加埋出面嘅比賽鼓勵身體碰撞，平時喺港超咁樣跌低就會吹，但出到去唔會有人理你，呢兩樣係我哋永遠唔適應。」Ellison深明青訓不足，是做成港足與亞洲勁旅之間有霄壤之別的主因。

一直以來港足沿用本地教練培育青訓，今次安達臣領軍港隊U23出戰亞運，與早前司徒文俊及張峰帶隊出戰U隊亞洲盃的成績及戰術成效似乎高下立見。看似摒棄「塘水滾塘魚」的模式，聘用更多外籍教練為港足青訓體系灌入新思維和衝擊，會否能夠提升港足水平？

Ellison回答道：「我諗相比起張峰同司徒sir嚟講，安達臣強調高位逼搶，而且佢落嘅指令係相對清晰同有效，而且佢係無可否認push到我哋多啲，五五波會叫我哋博盡，心態嘅變化上係令我哋夠膽去同一啲身型比我哋大隻嘅人撞，或者外籍教練好似安達臣咁曾經係出面教過波，清楚亞洲嘅頂級水平係點，知道我哋對住亞洲嘅強隊可以做啲咩，再為我哋制定合適嘅戰術。」

但他亦於言語中為張峰及司徒sir持平，「有啲嘢係無諗到有唔少年輕球員係唔識，好似回後防守要用單腳跳去頂波，呢啲嘢係應該細個踢波甚至青訓就要知，但原來喺香港地細個踢波係無人教，結果呢啲基本嘢上到嚟U18或U22都要由頭教過，仲要嘥時間逐樣逐樣執，咁教練仲點去灌輸戰術概念，所以有時青訓嘅表現或者水平無提升，係體系上根本嘅問題，將責任推晒畀1、2個教練有啲唔公道。」

「本地教練可取之處就係，熟悉本土球員嘅特質，而引入外籍教練帶畀球員新思維亦未嘗不可，兩樣係可以並軌而行。」Ellison回應指外籍和本地教練的存在並沒有衝突，更可以利用自身優勢，兼容並蓄。

港足青訓的詬病並非只是缺乏戰術概念的灌輸和忽視球員技術細節這麼簡單，回頭看來，每每在港足有好成績時，一眾「高層」爭相在鎂光燈下拋低一句「要拎多啲資源，再做好啲青訓」，但資源到手後，青訓做了甚麼改變？不從體系的根本改革，永遠只是在賽後輕言叼光，青訓的幼苗就只會從根開始壞死，港足難再枝繁葉茂。

【曾以行的足球路】以彳亍向前 成為職業球員（上）：
https://sports.now.com/home/news/details?id=38857843015

【曾以行的足球路】暫遷英 覓發展（下）
https://sports.now.com/home/news/details?id=38871948096

東方宣佈主帥盧比度離隊

2025/12/18 19:27

大埔1：2不敵東方 聯賽連續3場失分

2025/12/14 21:23

傑志2：1挫北區保榜首位置

2025/12/13 18:23

【亞冠二】大埔1：0挫河內公安光榮出局

2025/12/11 22:29

【亞冠二】大埔東方分途出擊求完美謝幕

2025/12/10 23:44