【曾以行的足球路】以彳亍向前 成為職業球員（上）

【Now Sports】於港足的亞運慶功宴中才得知曾以行（Ellison）兩日後便赴英升學，事出突然，便當場約定他翌日訪問。當天與他一同前往修頓球場時，他於路上滔滔不絕大談近況，比想像中更為健談，他亦笑言自己「好長氣」，到達球場後他不亦樂乎地分享自己的足球路。

曾以行由5歲開始接觸足球全因父親影響，機緣巧合下到香港巴塞足球學校接受更有規格的訓練，司職中堅的Ellison一直以來自問能力不及同輩球員，從來踢球只為開心二字，一直未想過成為職業球員，直至兩年前簽訂職業合約，他欣然接受這份挑戰。

由青訓提拔至傑志一隊，看似平坦的足球路，他坦言沒有梁志榮（細榮）的包容和欣賞，晉升為職業球員只屬空想。

他笑言：「準備DSE嗰兩年係一個肥仔，好少時間去踢波，即使間唔中去U18嘅比賽可能踢60分鐘就無氣，去踢波純粹想放鬆下，而且嗰段時間係最接近職業，但個狀態係完全唔似一個運動員，根本無諗過職業球員嘅事。」他於言語間不忘且感激對「細榮」於那段時間的包容：「嗰排無乜練波，佢都會畀我落場比賽，仍然對我好有信心，一直都鼓勵我可以再上到更高層次嘅水平，多謝佢睇到我自己都未必睇到嘅潛力同特質。」

千里馬也要有伯樂賞識，「細榮」向朱sir及伍健引薦他升上一隊，他終在17歲與傑志簽訂合約，成為一直從未敢想像的職業球員。Ellison直言升到一隊是非常夢幻，因足球生涯曾於高中時期裹足不前，到有伯樂欣賞，再接受披上傑志戰衣的挑戰，猶如彳亍向前的腳步，有停頓位但一直向前走著，從中找到自己的職業路，他深知這座夢幻城堡若自己沒有信心、欠缺「細榮」的挖沙堆砌，根本不能夠成形，恐怕自己最後只是一個愛足球的平庸青年。

比起升上一隊更夢幻的，便是僅與傑志簽訂合約3日就上演地標戰。

Ellison回憶道：「咁啱嗰個星期球隊一周三賽，有唔少中堅受傷缺席，謝家強同杜馬思受傷、朴俊炯未歸隊同埋羅拔圖停賽，中堅人選剩返我同艾里奧，心諗係咪真係要嚟啦，跟住就係前一兩日就知道對流浪嗰場菁英盃要踢正選，無諗過金東進咁信我，好多謝佢對我嘅信任，令我可以有信心咁去表現。」

他坦言「即使賽前會好緊張，但呢啲機會唔多，嚟到就要好好把握，要證明畀人睇我呢個𡃁仔係得嘅。」最後他正選夥拍艾里奧鎮守中路，傑志終以3:0擊敗流浪，地標戰以「零封」對手作結，無疑為他打下強心針。

效力班霸的壓力不止在於競爭大，還有外援不時的「貼心問候」、鞭策隊友的表現。不過Ellison作為年輕球員則未被「問候」，反而更獲得丹恩奴域賞識。

該名黑山射手曾被問到傑志最有潛力的年輕球員時，他點名曾以行是一個聰明的中堅，「其實一個咁有卡士嘅球員讚我係好難得，佢踢咗接近25年可以話係亞洲神鋒，得到佢嘅認同係一件好有成功感嘅事，呢個感覺好難想像，呢番說話係畀到信心我做更加多。」Ellison竊喜言道。

Ellison直言丹恩每每為訓練付出200%努力，「留喺gym room最耐嘅係佢，最老嘅都係佢，其實佢呢個級數大可以嚟到傑志hea踢，但佢清楚知道一個球員要做嘅嘢，訓練同比賽都會畀晒你」，這份職業態度無疑令Ellison十分佩服，更指丹恩已經是他鞭策自己的動力。

二人亦會私下交談，丹恩不時給予建議，「丹恩之前同我講過，練波要好似比賽咁認真，唔可以因為佢係丹恩，所以唔敢對佢硬淨，而且好深刻嘅係佢教我點樣mark佢，因為前鋒同中堅對位，佢會知咩防守技巧會令前鋒唔舒服。」他點點頭，並稱會銘記該名射手對他所說的一字一句。

就這樣一步步向前的足球路，在途中得到伯樂欣賞提攜，成為職業球員後獲慧眼賞識，眾人評點曾以行定成大器，他終不負眾望，在近期攀上球員生涯中的高峰——亞運……

【曾以行小檔案】
出生日期：2003年10月27日（19歲）
曾效球會：傑志、香港U23
司職：中堅
身高：1.81米
體重：70公斤

【曾以行的足球路】亞運前後的反思（中）
https://sports.now.com/home/news/details?id=38859960602

【曾以行的足球路】暫遷英 覓發展（下）
https://sports.now.com/home/news/details?id=38871948096

東方1：0挫理文

4分鐘前

大專最佳女將謝影雪：羽球改制教練喜訊

6小時前

蔡俊彥領軍稱霸世界劍擊聯賽洛杉磯首戰

10小時前

港隊亞沙運男子龍舟400米添銅

11小時前

港會2：1挫東區獲今季第2勝

2026/04/25 22:57