【十三短打】難為了辣妹

【Now Sports】呢條標題或者幾爭議，嫁畀個擁有近乎完美臭皮囊嘅萬人迷、不愁衣食，試問天下女子邊個唔羨慕，「辣妹」維多莉亞有幾為難？
撰文：球十三

的起心肝一口氣睇晒四集《碧咸傳》，碧咸（David Beckham）成名故事吸引，但更欣賞導演動人一筆細緻刻劃兩公婆感情。睇過嘅看官大概同意碧咸名副其實大細路一名，率性行事，一眼睇中辣妹維多莉亞（Victoria Beckham）就奮不顧身。辣妹比碧咸年長一年，喺碧咸未出道已經係女子組合Spice Girls紅人，最終被帥哥真誠打動，碧咸贏得美人歸。

一拍拖，男方就一直黐實佢，無論入波贏波、出事（世盃攞紅牌），簡直第一時間就想依偎個老婆。片中有唔少細節揭示辣妹為愛郎、為頭家、為囝囝仆心仆命，最驚係湊仔返學放學步步驚心怕綁架。除咗片中提到碧咸有潔僻好整齊咁摺好自己衣物，想像到屋企大小事務，靠晒辣妹。

嫁畀個天王巨星，實情湊個大細路。

嫁雞隨雞，辣妹嫁著碧咸注定奔波，由曼徹斯特搬去馬德里、再由馬德里搬去洛杉磯，餐餐都係臨急臨忙裙甩褲甩，當碧咸踢踢吓銀河外借去AC米蘭，辣妹終於頂佢唔順，決定同啲仔留喺美國。都仲未講佢陀B就生得，老公仲要死去同Jennifer Lopez、Beyonce宣傳合照，死未？

戲肉所在就係女人最痛，呈現老公有外遇嘅不快（最慘係點睇佢都索過第三者）。紀錄片未出街就事先張揚唔避談呢件醜事（查實只算輕輕帶過）；出街後，當年個第三者果然出嚟抽水。再次被揭傷疤，對辣妹嚟講，是可忍孰不可忍。

講到尾，做萬人迷老婆甚艱難。不過正正係經歷咁多仲係秤不離砣，不離不棄。

講番今次套紀錄片，片段珍貴，有感動位亦不乏笑位──碧咸俾曼聯逼走好無奈、法國佬施丹肯「紆尊降貴」用英語說碧咸過檔、卡路士同碧咸嘅隊友情誼令人感動、肥哨次次間場受訪四萬咁口，仲話「難模仿碧咸髮型」令人捧腹。仲有施蒙尼被問到當年碧咸應唔應該領紅牌爽快答「Absolutely not. Absolutely not. The contact was minimal. （絕對唔應該、絕對唔應該，只係輕微接觸） 」，事隔廿幾年都仲要摑丹麥靚佬球證尼路臣一巴......

好睇過之前無數咁多套球星自傳紀錄片。一時之選。

撰文：球十三
足球迷叫第十二人，冇偏愛，冷眼旁觀係十三。

留「城」借場練波 安祖斯乘機邀「哥」？

21分鐘前

為顯忠誠不脫「魔」 般奴自比托迪

2小時前

【FPL戰術室】隊長人選「幸福的煩惱」

4小時前

加士拿：4個U21球員踢到抽筋

5小時前

節日快車嚟啦！誰當主角？

7小時前