【十三短打】莫耶斯「天才」告別時

【Now Sports】以後唔再稱呼莫耶斯做「莫天才」，講到尾係帶有貶意。今次揚威歐洲，盡洗當年領軍曼聯失敗所帶嚟嘅長久屈辱，同一切不快切割。家陣，佢已經係韋斯咸傳奇！
撰文：球十三

莫耶斯當年執教愛華頓頭頭是道，曾經率拖肥得第4名參戰歐聯（外圍賽落敗），直到今時今日仲係愛華頓歷來喺英超嘅最高排名。及至費格遜2003年退休，莫耶斯獲欽點成為接班人執教曼聯，以為一登龍門點知係噩夢開始，諷刺係當紅魔喺4月輸俾佢嘅舊「愛」拖肥，恰好成為佢失飯碗嘅催命符。

對佢嚟講，最屈辱未必係宿敵利物浦球迷嘲諷佢為football genius，而係當會方決定痛下殺手，佢蒙在鼓裡，仲四周圍搵人加盟諗住為新一季組軍，呢單嘢真係淪為笑柄。喺曼聯經歷黑暗9個月後，佢一直孭住教曼聯唔掂嘅惡名，喺球壇浮浮沉沉，之後俾皇家蘇斯達炒魷、教新特蘭搞到降班，及至喺韋斯咸「又出又入」捱咗多年，終於有起色。

前季佢領軍得到第6名，上季更殺入歐霸盃4強；以鎚仔幫嘅兵力，再次分心應付聯賽同盃賽當然唔容易，結果護級成功之餘，仲得到球會超過半世紀嘅首個歐洲錦標，即使係所謂「第三盃賽」，一啲都唔簡單。當查洛保雲入奠勝球，佢激動得跑入場，及至完場又好似贏4強戰一樣跳跳紮，抵佢風騷。

「我唔會受呢啲前塵往事困擾。」莫耶斯好耐之前講過呢句話，係咪口不對心，唔知，只知佢今鋪真係苦盡甘來，單係呢次功績夠佢爬番起身。以後仲有人稱呼佢做「天才」嗎？就算有，應該會係帶褒義嘅由衷之言。

撰文：球十三
足球迷叫第十二人，冇偏愛，冷眼旁觀係十三。

【英超賽後loop】喜鵲進化變猛虎

43分鐘前

原來與婆婆撞車 福仔報平安：多謝關心

2小時前

普捷天奴籲班主：失望都要堅持

3小時前

阿迪達唔怪佐真奴

7小時前

英超今季最大勝仗 紐卡素8蛋碎「錫」

13小時前