【十三短打】難忘你鬼馬狂傲怪腳

【Now Sports】自由球，Zava！12碼，Zava！角球傳送目標，Zava！只要睇過《Ted Lasso》第3季，聽到教練要求將全部工作都交畀嗰個影射伊巴謙莫域嘅Zava，肯定都會捧腹。現實中嘅伊巴同樣獨特，佢掛靴啦，球迷將會深深掛念。
撰文：球十三

難忘伊巴謙莫域（Zlatan Ibrahimovic）嘅鬼馬。本世紀，體壇有兩個年青時好鬼馬，同樣流著東歐人血液嘅名將，一個係「扮嘢祖」祖高域，另一個就係伊巴（父母分別來自波斯尼亞、克羅地亞）。伊巴喺場內場外都鬼馬，係隊友眼中嘅開心果，面對傳媒又不時語不驚人死不休、曾經喺前教練摩連奴接受訪問時嚇一嚇對方......

更難忘伊巴謙莫域嘅狂傲。呢一點更加唔使講，試問球壇有幾多人敢自詡獅子、神，但回望佢嘅足球生涯，幾乎踢每間球會都攞過冠軍，證明冇胡亂託大，神乎奇技囂狂得起！佢曾經代表巴黎聖日耳門對安德列治嘅歐聯比賽，踢出一腳時速達150公里嘅重炮。仲有，一個1.95米高佬腳法咁細膩實在難得，十三聽過一個跆拳道教練老友對住學生講「要學伊巴筋骨咁鬆，踢到隻腳上到個頭度」──證明佢幾架勢！近年，隨住年紀大同埋受傷患困擾，係冇以前咁勇猛啦，但仲有貨交，改寫意甲史上最高齡入波歷史。

最難忘伊巴謙莫域嘅怪腳。實在太多你估佢唔到嘅入波，最經典當然係2004年歐洲國家盃怪腳（考起，真係唔知應該用一挑、一勾定一撥嚟形容）攻破鋼門保方，將意大利推到無劫不復，為瑞典其後同丹麥聯合夾死意大利鋪路。佢嘅神乎奇技，連保方賽後都走去向佢直豎姆指，寫個服字。2012年瑞典友賽英格蘭，睇佢嗰腳離門30碼倒掛入波，捱夜睇波睡眼惺忪，都一下子醒晒！

以後綠茵場少咗一個鬼馬、狂傲嘅怪腳伊巴，睇波肯定少咗樂趣。

見你眼泛淚光，我哋都好難唔一樣。

難忘你，伊巴！

撰文：球十三
足球迷叫第十二人，冇偏愛，冷眼旁觀係十三。

盧卡古：夾迪巴拿先要關係好

10小時前

羅馬收「科」 摩佬樂做球員避風港

12小時前

祖雲達斯守和阿特蘭大0：0

16小時前

風波平息？奧斯文向拿玻里重新示愛

17小時前

拿玻里社交媒體負責人下馬

20小時前