【葡萄牙熱血球迷】葡軍右路穿窿掛住簡些路？

【Now Sports】葡萄牙對德國輸2:4，但呢場真係睇到球迷熱血沸騰，應該係今屆最精彩一場！明顯見到雙方有攻勢，但葡萄牙因為右閘簡些路確診離隊，右路缺口暴露人前，德國把握機會強攻弱點取勝。領隊費蘭度山度士面對攻力更強嘅法國，要點填返個窿？

今場山度士出4-2-3-1 而唔係4-3-3陣，有雙防中，加基斯坦奴朗拿度單箭頭打突擊，應該係針對德國嘅部署。但開波先有德國詐糊，葡萄牙都好似未醒覺。葡萄牙一路受壓，防守安排縮後俾德國進攻，中場德國控制得好好。葡萄牙一直等待機會，終於趁德國角球，C朗解圍，再自己box to box 跑去對方禁區；同時賓拿度施華接應C朗頂傳，喺右路進攻，斜線傳畀祖達，祖達帶波跑入禁區，再橫傳畀已經極速跑到黎嘅C朗射入。葡軍領先1:0，紐亞又一次俾C朗入波。

落後嘅德國極力反撲，繼續逼搶葡萄牙，成功令到葡萄牙防守球員犯錯，入咗兩 球烏龍波。上半場葡萄牙入「3球」，兩球係烏龍攻入自己龍門。作為葡萄牙球迷都幾無奈，但要讚德國真係逼搶得好。

其實德國已經睇穿葡萄牙右路問題，左翼衛羅賓高辛斯如入無人之境，今日嘅雙防中完全無增加防守更係幫唔到施美度。所以下半場山度士作出變動，換入上次福將山齊士換出 施華，希望可以再喺右路幫一幫手。

可惜今次換人作用不大，施美度仍然畀好多空間高辛斯，山齊士亦唔係好守到佢，高辛斯利用速度同空間製造一助攻一入球，將比數拉開至1:4。令人馬上諗起2014年世界盃分組賽，葡萄牙輸0:4，因為得失球差太多出線無望。

好彩C朗又趁一次機會，神救返就出底線嘅皮球，傳中由祖達撞入，葡萄牙之後其實再有其他機會，但完場比數維持喺2:4。雖然失咁多球，但好彩上場贏3:0，出線仲有希望。

今場明顯輸防守，而下場法國攻力更強。開賽前右閘簡些路確診離隊，睇嚟對葡萄牙影響已經俾德國揭露人前，山度士真係要諗下右路點強補，同埋再用雙防中時，要點激活佢哋，唔好再企喺度睇人踢波。

C朗今場紀錄
今場C朗攻入1球，令佢今場破咗以下歐國盃決賽周紀錄：
最多入球： 12球，今場入1球
-最多出場次數： 58次，平保方紀錄

最後祝各位爸爸父親節快樂。分組賽冇晒9點早場，死亡F組下場仲係要大鬥法，爭取出線！加油，葡萄牙！

撰文：June
旅球迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。

溫布萊上演2028歐國盃決賽

2025/11/13 13:25