【我們都是這樣睇EURO】居澳華裔球證難忘夾意軍出局

【Now Sports】移居澳洲多年的港人李恆亮是當地的足球裁判，睇波閱歷甚深，最難忘是2004年意大利遭北歐雙雄的2:2戰果夾出局一幕，今屆，他追棒英格蘭，但睇好法國奪冠。

本職是工程師，同時擁有澳洲足球裁判執照，執法當地省級聯賽的李恆亮，是2018年Premier League women grand final的主裁判，本身自是波癡，早於1988年就睇歐洲國家盃。對於這個賽事，他最難忘是2004年意大利由喜變悲，球員、球迷心情起伏的逆轉：「當年C組最後一輪分組賽，意大利對保加利亞，意大利於94分鐘最後一擊入波【編按：入球者為卡斯辛奴】，贏2:1，全隊瘋狂慶祝，點知唔夠1分鐘，另一場瑞典喺89分鐘嘅入波，同丹麥打和2:2。」

「結果3隊同分，意大利因對賽成績出局。球場上3隊球員同球迷喺1分鐘內反應由高至低或由低至高，真係畢生難忘。」

同好多香港成長的人一樣，李恆亮睇開英超，今屆賽事支持英格蘭，但睇好世界盃冠軍法國能夠稱霸：「連後備都仲係當打年齡……實力太強！」對於今屆賽事，他期望有更多球迷可以入場觀戰。

澳洲與香港一樣，與歐洲有時差，決賽周比賽多數是凌晨時份，期間如何安排工作、睇波？李恆亮謂：「工作正常，但科技進步下，只要唔開facebook、whatsapp或足球網站，就可以從電視台清早睇返比賽。最想睇現場比賽時，唯有之前嗰晚10點就瞓覺。」

澳洲相比起全球很多國家，疫情較輕微，故被問到決賽周最想與誰睇波時，他顯得雀躍：「可以和朋友一齊喺朋友或者自己屋企睇波！」

下次預告：一個愛「德」徹底的出版編輯。

【我們都是這樣睇EURO】
我們都是這樣長大的，都是這樣睇足球。歐洲國家盃大概是世界盃以外最受注目的足球國際賽，球迷當有睇EURO的難忘片段及對今屆賽事的期盼，【我們都是這樣睇EURO】內的，可會與看官的心思意念相同？
（本欄於EURO決賽周前不定期上載）

溫布萊上演2028歐國盃決賽

2025/11/13 13:25