【專訪】車迷：賣安素可以接受

【Now Sports】阿仙奴周日與車路士爆發倫敦打吡大戰，賽前邀請雙方球迷會代表大談愛隊現況，以及為今場大戰作出預測。

問：記者
答：Edmond（香港車路士球迷會會長）

問：點睇球隊喺今屆轉會窗嘅部署？係咪球迷所預期？
Edmond：今個轉會窗應該係BlueCo入主後，做得最好嘅一個轉會窗。上季球隊表現未如理想，所以今季都針對性作出補強，例如龍門嘅大馬天（馬天尼斯）、後防嘅麥桑斯拿卡，前面嘅摩根羅渣士等等，加上補入佐敦軒達臣同韋碧克兩位老將，彌補球隊經驗不足呢個短板。另外又清走一班被認為能力不足以喺球會立足，又或者表現唔符合預期嘅球員，雖然最後關頭安素離隊，球會未有補充到新血係有啲瑕疵，但整體嚟講，我對球會喺今個轉會窗嘅表現係滿意，同埋符合預期。

問：可否講講對Enzo離隊嘅睇法？
Edmond：坦白講，球迷會入面都有唔同聲音。安素係一個有質素嘅球員，而自佢加盟球隊以嚟，姑勿論踢成點，佢喺場上表現出嚟嗰團火，係我哋欣賞嘅。但奈何近呢半年流出嘅傳聞，同球隊嘅動盪，的而且確影響咗佢同一眾車迷嘅關係。加上以沙比阿朗素用開嘅陣式同打法，球隊需要中場中嘅球員，係硬淨同覆蓋範圍大，咁就令到安素唔再係球隊中場中嘅最佳人選，與其要佢適應一個未必適合嘅踢法，賣走佢而球會又可以有錢賺，做靚條數嘅話，佢走都可以接受嘅。唯一係將佢賣畀競爭對手，就差咗少少。

問：點睇呢場周日打吡大戰？車路士有咩爭勝有利、不利因素？
Edmond：始終阿仙奴都仲係喺強勢之中，預計都係一場硬仗。對車仔嚟講，有利當然係阿朗素已經執教咗幾場，對球隊應該已經有一定嘅熟悉，而同樣地，球員對阿朗素嘅戰術同要求，都有更深嘅了解，相信球隊嘅表現，可以比之前再進步。至於不利因素，正如之前所講，安素喺轉會窗最後一刻離隊，雖然之前兩場比賽，佢都已經冇上陣，但始終都係少咗一位有質素嘅球員，實際會唔會對球隊實力同士氣有所影響，都係未知之數。

問：如何應付阿仙奴死球？
Edmond：今季我哋球隊加入咗新嘅死球教練，由於上季佢都係喺英超球隊工作，已經見識過阿仙奴嘅死球戰術，相信一定會有啲對策。同埋今季英超聲稱會嚴打對門將嘅騷擾行為，呢樣應該都會削弱阿仙奴死球方面嘅威脅。

問：估計今場戰局會點發展？
Edmond：觀乎上兩場嘅表現，相信今場阿朗素都唔會同對手爭控球，快速反擊將會係車仔今場嘅殺著！雖然之前兩場都大手交易，但今場強強對碰，估計雙方都會小心為上，賽果都係1球上落，我當然係希望車路士小勝對手啦。

問：今晚球迷會有冇睇波活動？
Edmond：因為係星期日晚夜場，今場我哋就冇安排睇波活動，不過星期六（12號）對侯城，我哋就有安排，詳情可以留意我哋FACEBOOK同IG。

問：球迷會新一季有何活動部署？
Edmond：今年係我哋球迷會成立30周年，我哋都會有啲搞作，重頭戲就會係今季將會搞英國睇波團，依家已經開放咗畀會員報名，嚟緊12月就會出發，會去倫敦史丹福橋球場，睇車路士主場對水晶宮，同埋對利物浦嘅比賽。如果反應熱烈，我哋希望可以喺季尾再搞多團。另外，今年我哋仍然會有不定時嘅睇波活動，嚟緊周末就會有第一次睇波活動，已經開始接受報名；仲有就係球迷會足球隊，之前都進行咗兩輪新隊員選拔，初步都揀選咗一啲新隊友入隊，嚟緊我哋除咗會繼續約其他球迷會同球隊，例如之前踢過嘅皇馬、利物浦同埋仁足社等等進行友賽外，都會再物色一啲適合嘅聯賽去參加。
同埋今年我哋都加入咗WILL仔同KRISTY卓麗馨兩位新幹事，希望可以再提升球迷會嘅覆蓋面，咁嚟緊都商討緊一啲畀會員同電競有關嘅項目，希望畀啲新鮮感大家。當然，最緊要嘅都係繼續凝聚一班香港車迷，繼續撐車啦。

英超 阿仙奴 對 車路士
Now TV 621台 06/09 23:30直播
Now TV 611台 4K直播

【專訪】兵迷：迫彭馬往邊路

1小時前

狂牛之友！阿迪達「控制」VS 阿朗素「反擊」

4小時前

阿迪達鬥「車」前推崇薩卡：提升另一層次

6小時前

馬利斯卡：安素表現相當好

7小時前

【英超‧預告】車仔乘勇向槍手挑機

9小時前