維拉忠粉Kidd：盼女兒流Claret色血

【Now Sport】噚日官方終於宣佈阿士東維拉再嚟香港，但講真，心情已經冇一個月前率先收到風，話愛隊會嚟嗰陣咁激動。反而最開心係收到唔同亞洲地區球迷，私訊問我相關消息，仲約埋到時點樣一齊聚下。
撰文：Kidd

對上一次維拉嚟香港，已經要數到2011年英超挑戰盃，當年焦點全部放喺車路士，基本上布力般流浪同維拉都冇乜人理。我記得好清楚，嗰陣維拉搞個活動邀請本地球迷睇賽前操練，最後只得5個球迷參加。你話啦，想搵到一班志同道合嘅朋友，真係一啲都唔容易。

正正因為嗰次活動，我識咗人生最重要嘅一班維拉朋友，佢哋陪住維拉，亦陪住我經歷過高低起跌。

之後夫人開綠燈，去維拉公園影結婚相同埋搞咗個維拉主題婚禮，令我呢個平凡嘅維拉球迷搖身一變，一講起「維拉香港球迷」，就即刻諗起我嘅維拉球迷；仲要威到可以上埋全球著名《442》足球雜誌，同球王美斯一齊做封面；仲好榮幸得到上任會長推薦做咗香港官方球迷會會長，最令我開心嘅，係由當初得嗰三幾個人，到依家可以聚集到一班真球迷，一齊傾波經、一齊撐維拉真係好唔簡單。

而且，仲識到世界各地（包括泰國、新加坡、馬來西亞、澳洲、日本、中國、愛爾蘭、美國、挪威等）唔同地方維拉球迷，成為朋友。

人生去過維拉公園同溫布萊睇決賽，已經係好好嘅經歷，可以話無憾，當然季尾可以畀我實行伊斯坦布爾之旅（編按：歐霸盃決賽場地）就更好。

依家上天安排15年後，維拉再次訪港，今次，我好希望個女可以感受到爸爸對維拉嘅瘋狂熱愛（雖然佢本身應該都感受到），仲可以同我一齊瘋狂追星。

希望佢今次活動之後，更加熱愛維拉，繼續流住維拉嘅Claret色血，繼續撐維拉直到永遠。

Up the Villa！

相關文章：
【我們都是這樣睇波的】「拉」著你的手
https://sports.now.com/home/news/details?id=11776861782

撰文：Kidd So
香港維拉球迷會主席

從法乙到英超 確比有安巴比影子？

3小時前

【英超預告】利記迎富咸求反底

11小時前

【英超預告】阿仙奴勢折「茅」鞏固榜首

11小時前

韋斯咸屠狼踢熱刺落尾3

12小時前

道歉照停賽 安素避戰曼城

16小時前