【我們都是這樣睇波的】「拉」著你的手

【now.com體育】「從今天開始，我的手會拉著您的手，度過每1年……」。山盟海誓說過、一個名動中外的「維拉婚禮」圓滿結束，此刻阿士東維拉狂熱球迷阿Kidd，依然要為心中所愛忙個不休：既與阿嫂努力建設「維拉之家」，又積極搞活動加強球迷會聲勢，連外國權威足球雜誌《Four Four Two》也邀約訪問。說到底，「拉」著你的手就是一生一世，義無反顧把責任扛上肩的深情承諾。
記者：張仲碩

何謂童話式婚禮？能夠與摯愛完成以擁戴球隊為主題的婚禮，手牽手甜蜜步入人生另一階段，那就不枉此生。身為阿士東維拉超級球迷，亦是Hong Kong Aston Villa Lions Club（香港維拉球迷會）會長的阿Kidd，在去年12月19日與愛侶Destiny結婚，整個婚禮都圍繞阿士東維拉——戥穿石著上維拉波衫、車頭公仔是維拉吉祥物、以12及19號（代表結婚日期）維拉波衫代替賓客簽名布、宴會廳滿是球會氣球、賓客名單用上維拉team sheet格式，連合巹交杯也是維拉的杯，果真別出心裁。

席上，兩位新人除了接受親友祝賀，還有遠道而至的維拉官方代表送上祝福，並把婚禮過程拍成短片上載至球會官方網，一句冧死人的「您永遠都係我心目中嘅no.1，您嘅重要比維拉更重要！」，讓全世界維拉球迷共證婚盟，最教阿Kidd窩心是球會給他的驚喜，即場播放由維拉球星爭相送上的祝頌語。

「好開心老婆肯配合，呢個係我由細到大嘅夢想，未識佢之前已有呢個構思。相信強如曼聯fans都未必會咁樣搞婚禮，同埋得到官方支持。」阿Kidd道出籌備這個主題婚宴的緣由：「我有個廣州朋友都係維拉球迷，佢現職維拉市場推廣，同佢傾過，然後佢請示上司，對方都覺得有gimmick，加埋我係Lions Club香港會長，所以佢哋好樂意喺呢個婚禮投放資源。」

「官方私底下送畀我嘅短片，艾邦拉荷、華亞爾等等都有留言，係驚喜，全程由佢哋同我老婆夾，不過我都估到佢哋做咗少少嘢（說時微笑）。」更令阿Kidd意想不到是球會超新星，也是Kidd非常欣賞的基亞利殊（Jack Grealish）在個人twitter向阿Kidd送上祝福。

問阿嫂可會覺得嫁給阿Kidd，等同「嫁給」維拉，她說：「其實冇太大感覺，不過好似更加融入佢哋維拉球迷會，同埋冇諗過個婚禮迴響會咁大，即使喺外國都咁多報道。有啲朋友都問點解我哋咁犀利，可以搵到球星拍祝賀我哋嘅說話。」「其實當初老公話想搞維拉主題婚禮，我都猶豫過。後嚟連官方都派人嚟拍嘢，成件事出嚟效果都好好，係我預期之外。最終決定搞呢個婚禮係冇錯。」

據阿Kidd表示，Destiny與他相戀前並非球迷，但拍拖後時常相伴睇波，早已「夫唱婦隨」：「佢經過我『調校』後成為維拉fans，拍拖一定齊齊睇夜晚10點場，每當我睇波好激動嘅時候，佢就會好搞笑咁叫我『睇波唔好講咁多嘢』。」

阿Kidd鍾情維拉始於英超成立（1992/93），當時本地電視台每周播精華，每月總會有直播，那一季，維拉得到聯賽亞軍。「鍾意冇特別原因，可能係情意結，第一次睇維拉，一鍾意就鍾意超過20年。」問他多年來最喜歡哪些球員，他沉思良久後說：「冇咩邊個特別鍾意，我鍾意成隊波。麥格夫（前英格蘭球員先生）真係維拉legend，但當時太細個，艾邦拉荷？其實唔太鍾意，覺得佢態度麻麻，近年表現跌得好緊要，如果冇位爆，佢根本唔識踢。」阿Kidd又鬧爆根本心繫愛華頓的湯卡華利，認為球會該予年青球員更多落場機會。他喜見尼敦巴卡及艾殊利韋斯活特近年進步神速，又推崇基亞利殊，認為後者前途無可限量。

談到最難忘比賽，他說是2008年12月勝愛華頓3:2之役：「記得補時俾尼士葛扳平2:2，以為會和波，但隨即開番波好似10秒就由艾舒利楊格單刀射入。嗰季同愛華頓爭緊打歐霸盃資格，好深刻。」

2011年，維拉以強陣訪港出戰英超挑戰賽，讓阿Kidd認識到志同道合的球迷：「當時官方安排活動，只要球迷喺旺角某運動鋪頭同艾邦拉荷1:1紙板合照，就有機會睇隊波操練，結果接觸到好多維拉球員。維拉其實重視香港市場，年年都派隊來港參加7人賽。」

阿Kidd組織過非官方球迷會，去年，Lions Club的外籍會長眼見阿Kidd有heart，交由他接棒。經過這次「維拉婚禮」，阿Kidd坦言一份更強烈的使命感油然而生，決意搞好球迷會。正因會員為數不多，Kidd盼透過傳媒提升球迷會的知名度。

這個願望該不難實現，婚禮後，已有部分媒體轉載當日官方網新聞，而《Four Four Two》雜誌昨晚與他聯絡，邀他進行電話訪問，成為now.com以外首個專訪他的媒體，相關報道很快面世，而相信類似採訪陸續有來。

身為球迷會會長的他有個「特權」，就是獲邀在5月份到維拉公園，與世界各地的其他Lions Club會長踢波。原來那將是他首次踏足維拉公園，現計劃在球場與Destiny再影結婚相，盼圓多年心願。

除了遠赴英倫，阿Kidd刻下尚有一個心願，就是盼維拉不要降班：「其實今年好大機會降班，球隊攻力好弱，一失波就冇得追，隊波，其實冇英超水平。下面嘅球隊，西布朗有比拉希奴識入波、新特蘭引入迪科爾，問你驚唔驚？般尼快車期搶到好多分，而QPR係有錢球會……。」新加盟的卡利斯基爾，顯然是阿Kidd心目中的護級希望：「佢腳下功夫好，對利物浦後備入場，隊波即刻生晒，佢做咗3次過人動作，維拉就係需要呢啲中場指揮官。」

愛之深，責之切，阿Kidd最不滿現任領隊保羅林拔東效西顰：「林拔之前向哥迪奧拿學法，竟然放棄擅長嘅長傳急攻、快速反擊而踢控球在腳。佢每場波所講嘅進步都唔存在，希望快啲炒左佢！」也難怪阿Kidd著急，維拉在最近的死亡秩序先負利物浦0:2，到去仗狂吞曼城5蛋，若明日再負車路士，隨時跌落護級線。

後記：阿嫂重要過維拉！

訪問本來構思是到阿Kidd家中進行，但原來正進行裝修，據說兩人正積極打造「維拉之家」，屆時家中會有一個巨大的維拉球會Logo。訪問最終轉移到一間咖啡店進行，阿Kidd甚為有heart，把多年來與維拉的相關珍藏帶來，如數家珍逐一介紹，有興趣可登入Hong Kong Aston Villa Lions Club的facebook瀏覽。

數天後忽發奇想，透過電話追問他：「將來如有子女，可會改與球會相關的名字？」「如果男仔會改Given（維拉門將是基雲Shay Given），一來我老婆like，二來個名有意思，我會由細到大要囝囝接觸維拉。其實已經買咗維拉奶樽、學習杯，等真係有BB就用。」講到尾，最主要都係因為老婆like，一如他在短片內情真意切的一句：「您永遠都係我心目中嘅no.1，您嘅重要性比維拉更重要！」

阿嫂，收到冇？

相關網址：
維拉官方報道「維拉婚禮」：
http://www.avfc.co.uk/page/NewsDetail/0,,10265~4408469,00.html

Hong Kong Aston Villa Lions Club 香港維拉球迷會facebook：
https://www.facebook.com/HongKongAstonVillaFansClub

維拉頻道：
https://www.youtube.com/channel/UCm_cfp-GvA5ap8qKCroa7KA?app=desktop

（我們都是這樣長大、都是這樣睇波的，本欄讓球迷發表睇波經歷與心聲，每隔兩星期五上載）

何輝：PSG求衛冕 阿仙奴爭首成歐洲冠軍

10小時前

【歐戰之巔猛將篇】硬撼鐵三角 懷斯世界級考驗

10小時前

巴塞官宣 哥頓8000萬歐元入「塞」

13小時前

真掃興！侯城赴美賀升班冇得飛

19小時前

生涯最強對手！哥迪奧拿想約高普食飯

23小時前