【球迷對談】紐利擁躉點睇大變動？

【Now Sports】紐卡素主場鬥利物浦，堪稱首輪英超的焦點戲碼，適逢兩隊今季都換帥，人腳亦變動不小，兩隊的香港球迷會代表對此有何看法？對於今場大戰，又有何預測？

Tammie（香港紐卡素官方球迷會會長）
Mino（香港利物浦官方球迷會會長）

【論變動】

紐卡素今季有東拿利、基馬尼斯及哥頓離隊，Tammie直言有點兒始料不及，但亦正面看變動：「上季其實都踢得麻麻地，不如就變一變。唔變，可能又係咁樣，班球員好似死氣沉沉，冇乜心機睇波。可能內部好多嘢發生咗，我哋唔知，既然係咁，領隊變，核心球員又變。買咗咁多後生仔番嚟，其實都係賭博，好多都冇英超經驗，又未必咁快適應到英超嘅身型對抗性，要一段時間至可以磨合到。」

「我相信離隊球員中，以般奴（基馬尼斯）離開影響最大。哥頓喺歐聯踢得好好，直頭判若兩人；喺英超，佢喺左路應該俾人睇通晒，得一招。大概兩三年前狀態好弗，真係可以推埋大位射門，但舊年同前年開始再冇呢一招，一味推落底。啲英超後衛，你一推我就撞。」

「對於新球員，邦巴喺法甲嘅時候表現好，夠高大，同埋睇佢喺幾場友誼賽表現ok，但係咪即食，可以代替本來冇咗嘅球員，我就覺得未必得住。嚟自阿積士嘅史迪亞講到似法基迪莊嘅類型，睇佢幾場友誼賽，中場hold波幾好。巴蘇曼拿托希啲波似哥頓，好直接，但出波質素仲好過哥頓，對佢期望更高。」

利物浦除了沙拿、干拿迪及羅拔臣離隊外，由伊拉奧拿取代前季冠軍領隊史洛，Mino認為兩人風格不同，不宜即時作出比較：「伊拉奧拿畀我嘅感覺係務實、低調，同埋啲波比較進取。除咗教般尼茅夫嗰幾年之外，季前友賽對列斯聯、科木等等嘅比賽，都見到踢主攻，側重左右翼。史洛就鍾意控制節奏。講到進取，伊拉奧拿更好，不過要畀多少少時間佢build up利物浦，到時再比較，對佢會公平少少。」

【論勝負】

Mino：「我哋對紐卡素嘅往績都唔錯，除咗前季聯賽盃決賽輸咗，對碰成績稍佔上風。季初兩隊變動都大，新舊交替，都存在不明朗因素，所以比以往難預測。紐卡素球迷一向熱情，每次作客聖占士，就算贏都難打，而今場可能見到伊薩返嚟，特別落力『招呼』伊薩（Tammie即時插嘴笑言：「一定會！」）。今場波有奇雲基瑾嘅悼念儀式，對利物浦嚟講，佢都係名宿、傳奇前鋒，而佢喺紐卡素亦有一段輝煌時間，喺球迷熱烈打氣情況下，紐卡素嘅球員鬥志會好好。今場波係惡哽。」

Tammie：「對上一次紐卡素喺聖占士聯賽贏利物浦，已超過10年，過去往往踢多個球員又好，唔係俾利物浦反先就係絕殺。唔知點解對利物浦特別難踢，球員見到利物浦就震晒。正如Mino所講，大家啲球員都幾新，未必熟路，我哋新領隊也斯利嘅風格好進取，加埋主場戰意稍高，當季前友誼賽踢得麻麻，希望返到聯賽有驚喜。」

【互相發問】

Mino：「點睇球隊之前被收購後，似乎曾經重拾強隊感覺，但今季冇咗領隊艾迪賀維，球員冇咗查比亞、基馬尼斯、東拿利、哥頓，同埋之前一年冇咗伊薩，好似未達到期望，仲更加倒退。球迷會唔會對領導層好失望？」

Tammie：「我唔能夠代表所有球迷，我個人覺得有時球會唔係想賣球員，但好似東拿利買番嚟4000至5000萬鎊左右，依家賣1億鎊；基馬尼斯29歲都有7000幾萬鎊嘅價錢，至於哥頓，我哋球迷不嬲鬧得好勁，都賣咁好價，依家巴塞隆拿睇得起我哋嘅球員喎！有時都擔心管理層冇心搞，但又見球會買地起訓練場，又肯用錢嘗試換班，我又覺得ok。只不過今季傷啲，同球員分手咁多次，仲要個個都係核心球員。」

Tammie：「就沙拿離隊，你認為係咪都係時候move on？」

Mino：「唔止係沙拿，今年走嘅球員都係大家鍾意，好似干拿迪、羅拔臣，仲有鍾斯。睇住呢啲高普年代嘅球員離開，個心一定唔舒服。正如你所講，既然已成定局就move on。就沙拿呢個case，總有一日要面對，試過用唔同人替代，暫時好似蒙路斯好少少，但短時間要去到沙拿嘅level，對佢都唔公平。之前球隊無論踢法，或者中場配搭都遷就沙拿，令佢發揮到最大極限，依家一個iconic球員離開，唔止球迷，伊拉奧拿都頭痕。」

【戰果預測】

Mino：「呢場開鑼戰，我相信大家都會好緊張，一場五五波，雖然牌面上我哋好似高少少，但紐卡素有主場之利，過去我哋對住紐卡素就算贏波或和波都好，都係食鬥心。就算對中立球迷嚟講，我相信今場波都好有娛樂性。我哋始終後防新組合，季前賽對住列斯聯、摩納哥都係先贏後輸番，我估今場我哋贏2:1。」

Tammie：「我哋啲波，贏輸一件事，通常都幾好睇。我有信心，依家係青春班，班𡃁仔想表現自己，又主場對住利物浦，相信可以激發佢哋，贏2:1。」

【球迷會動向】

兩間球迷會今晚分別在旺角及灣仔搞睇波活動。談到未來動向，Tammie說：「我哋舊年至成為官方球迷會，希望9月中或者月底搞會員招募日，提供少少折扣優惠同埋活動，好多仲係同球會初步傾緊，亦可能會搞聖占士球場朝聖活動，盡量搞。」

Mino：「過去兩日都有招收會員。除咗踢波同埋睇波活動，亦希望搞捐血或者陀螺比賽。因為有啲女性會員唔踢波，希望搞多啲唔同種類活動，更多人參與。」

英超 紐卡素 對 利物浦
Now TV 621台 23/08 23:30直播
Now TV 611台 4K直播

曼聯英超失利 舒利亞：球員很平庸

1小時前

沙迪利雅膝傷不樂觀 水晶宮大為頭痛

2小時前

巴利巴斟好個人條件 投紅魔鬼待官宣

4小時前

虎威！阿積爾：外界不再輕視我們

11小時前

【英超‧預告】伊薩回歸 利物浦強襲紐卡素

12小時前