當年獲鼓勵 明斯向小球迷Claret贈波衫

【Now Sports】3年前，小女孩Claret藉短片，向當時養傷的阿士東維拉球星明斯送上真摰祝福；3年後，明斯與小妮子難得在香港會面並贈送球衣，場面動人。

阿士東維拉後衛明斯（Tyrone Mings）當年重創後，一度潛藏令人憂心，數月後，他透過社交網絡發放片段，感謝養傷期間來自世界各地球迷的慰問，包括Claret。當年Now Sports亦有報道〈明斯潛藏多時終出post 感謝香港小女球迷〉：https://bit.ly/4wP51Pl

今次維拉訪港，一眾球迷當然希望近距離接觸偶像，結果Claret願望成真。

Claret的父親，擔任香港維拉球迷會主席的Kidd說出事情經過：「其實今次維拉嚟香港，真係好想帶Claret見明斯，始終係佢最鍾意嘅球員，希望親身見到佢。但其實好難同球員接觸，因為今次保安比較嚴密，要同球員接觸，或者影相都困難重重，好沮喪，亦都有聯絡官方嗰邊，希望可以做到呢件事。」

「皇天不負有心人，本身搵個職員睇下可唔可能賽後搵到明斯，但係有個小插曲，完場後明斯去維拉球迷區向球迷致謝，先去中國球迷會嗰邊同球迷簽名、影相。當時同我哋呢邊有距離，到佢準備走，經過我哋嗰區嘅時候，我哋香港球迷就大嗌『Tyrone！Tyrone！呢度有個球迷等咗你好耐，係你超級Fans，你受傷嗰時拍過片畀你』，佢聽到之後又真係停低咗。」

「阿女其實寫咗封信，話佢聽好高興佢嚟香港，亦都話佢知之前斷腳，拍過片畀佢，今次好想見佢，喺封信度畫咗自己同明斯個樣。」Kidd續說：「咁啱明斯停喺度，畀咗封信佢睇啦，睇完之後就同Claret傾咗幾句，佢話記得，重傷時收到Claret嘅鼓勵，最尾亦都送咗著緊嗰件波衫，會方亦安排Claret同明斯單獨合照。明斯就問佢：『你有冇踢波㗎？』亦問佢踢邊個位，我就代答前鋒。因為明斯係防守球員，跟住佢問Claret：『有冇興趣一齊踢幾腳？』最後兩個喺草地踢咗幾腳。」

Kidd表示說到最後還是要多謝球會：「之前期望同球星簽名或者合照都做唔到，有啲沮喪，因為有太多非維拉球迷喺酒店等，會方知道有好多係為咗攞簽名球衣去賣，落咗order唔主動咁做。好彩會方最終有聽我哋嘅聲音，安排呢件事。」

「真球迷，肯付出，最終係有回報。」Kidd總結道。

相關片段：
https://www.facebook.com/share/r/1DT1g5cXmC/
https://www.instagram.com/reels/Cz6iY9nM9Q4/

三笘薰國際賽前難復出

3小時前

土耳其航空下季贊助 紅軍5年進帳3億鎊

3小時前

哥列斯卡未發「維」先受傷

9小時前

占士力撐沙比：只是小挫折

2026/09/07 23:00

域卡利奧大讚舊帥迪些比：言出必行

2026/09/07 20:25