【躉我講隊波】戰戰競競殺入4強

【Now Sports】英格蘭8強對挪威，激戰120分鐘下憑著比寧咸梅開二度，以2:1反勝晉級。愛隊今場表現仍未能完全說服我，可幸全隊繼續保持高效防守紀律，雖偶有失魂，但仍靠眾人合力抵住先失球的劣勢，再交由隊中世界級球員扭轉戰局。
撰文：Jansen（英格蘭擁躉）

回看整場比賽，上半場大部份時間雙方都處於膠著狀態，但挪威在飲水Break後突然谷了一段，就由舒特立一球半傳半射收死碧福特，打破悶局。幸好完半場前比寧咸（Jude Bellingham）一次世界級禁區入攝，挪威一班後衛企定定睇住佢妙射扳平。

來到下半場，戰況比上半場更緊湊入肉，杜曹率先變陣換入艾斯和薩卡（換走馬度亞基和疑似受傷的懷斯）加強攻力，球隊也一度踢出氣勢，不過入唔到波；轉頭就由挪威壓返住嚟踢，角球攻勢尤其有威脅，更試過詐糊及中楣。

一路睇下半場，我一路對杜曹接連換人不明所以，英格蘭球員固然多才多藝，但要球員在同一場球賽內踢多個位置，最終搞到球員自己都亂了，也令挪威佔據更多攻勢，可幸造就不到射手賀蘭有太多射門機會。

我明白杜曹的做法是希望臨尾谷一段，靠著一眾後備球員有氣有力做前場壓迫，搏對方失誤，可惜不成功，雙方需要加時作賽。最後，英格蘭把握到挪威門將利蘭彈琵琶，比寧咸門前執雞成功反先，這個比數也捱到完場，三獅球迷可再次高歌《Wonderwall》，仲唱埋《Hey Jude》向今場MVP比寧咸致敬。

單從結果論而言，今屆英格蘭成功晉級4強，無疑比上屆8強出局有進步。不過論整體表現，愛隊仍然未夠說服力，如果無比寧咸和哈利簡尼這兩個世界級球員，恐怕英軍根本唔識入波。

不過有彈也有讚，球隊在杜曹帶領下，全隊士氣高漲，防守也漸入佳境。來到準決賽，英軍的對手會否是當年宿敵？當面對真正強隊，我們有沒有足夠能力對抗？

撰文：Jansen
前音樂雜誌《mcb》作者，現開設了「字裡知音人」樂評網站。愛音樂，亦愛足球。音樂口味非常大愛，會聆聽及Respect不同音樂類別；足球就十分專一，只捧曼聯和英格蘭。

【躉我講隊波】由列強擁躉在每場比賽後講愛隊。

拜仁3主將周末歸隊 德超盃料任後備

6小時前

3大足協狙擊恩芬天奴：足球不屬個人

10小時前

霍頓冇份踢世盃 女友賤賣三獅波衫

17小時前

粉絲撲空！新郎不是C朗……

2026/08/09 06:45

美斯父親佐治離世

2026/08/08 22:29