【躉我講隊波】又係隊長救全家

【Now Sports】英格蘭對剛果民主共和國（民主剛果）的32強賽事，一如所料是攻防大戰，始料不及是英格蘭開場不久已失守，令民主剛果可以專心泊大巴，而英軍最終成功破密集反勝的方法，不是靠甚麼靚絕組織或神調動，而是靠神奇隊長哈利簡尼again！
撰文：Jansen（英格蘭擁躉）

上半場7分鐘，民主剛果第一次正式攻勢已士哥。當時他們先從右路大腳斬入禁區，卻發現英格蘭只得右後衛史賓斯在中路以一敵二，自然走漏從左路後上的施賓加，佢射返近柱，皮球應聲入網。

這一球，門將碧福特當然可以做得更好一點，最大問題是後防露出極大空位，就當是一開場未企穩陣腳吧，但其實在分組賽第一場對克羅地亞時候，英軍的防守已出現過類似問題，至今一直未解決。

失球後，英格蘭當然要積極反撲，此時又出現球隊另一問題——唔識破密集。當然你可以說民主剛果門將安柏斯踢到上晒身屢救險球，加上韋斯咸守衛雲比沙卡護空門、救出前隊友華舒福的近射。來到下半場，杜曹接連換入哥頓、薩卡及艾斯，企圖改變戰局，都是無甚效果，結果仍是靠隊長哈利簡尼（Harry Kane）一人救全家。

75分鐘，簡尼先是接應哥頓傳中，升到最高點頂出一球角度力度皆有的攻門，安柏斯拍到個波都入網。成功追平後，氣勢自然回到英格蘭這一邊。86分鐘，簡尼再次接應哥頓傳球，在中路以一敵二，仍可以俾佢搵到空位勁射掛網，英軍就是靠隊長梅開二度，驚險反勝民主剛果晉級。

愛隊贏波，當然全隊都有功勞，斬獲兩次助攻的哥頓亦值得一讚；但有睇罷整場波的球迷都知道，如果英格蘭沒有簡尼這名真正世界級射手，能夠將兩個50/50機會轉化為入球，恐怕英軍已拜拜。

今屆世界盃，英格蘭就看隊長簡尼，加上比寧咸兩名世界級球員，可以帶領球隊走到多遠，而不是靠領隊杜曹。下一場16強將會迎戰墨西哥，對手是主辦國之一，未必會全力死守，還望愛隊後防到時生生性性！

撰文：Jansen
前音樂雜誌《mcb》作者，現開設了「字裡知音人」樂評網站。愛音樂，亦愛足球。音樂口味非常大愛，會聆聽及Respect不同音樂類別；足球就十分專一，只捧曼聯和英格蘭。

【躉我講隊波】由列強擁躉在每場比賽後講愛隊。

柏基達16強難攞「威」 尼馬頂上？

1小時前

祖達離世一周年 紀念碑豎立晏菲路

3小時前

【世盃‧強者】快過安巴比賀蘭 澳洲有個極速後衛

4小時前

埃及高層與保安發生肢體衝突

5小時前

頭髮惹的禍！馬坦洛域：運氣太差

6小時前