劉舜文：荷蘭友賽不敢HEA

【Now Sports】距離世界盃開鑼大日子，尚餘8日左右，小弟除了關心愛隊德國之外，其他球隊都絕對不會忽略。香港時間周四凌晨「橙衣兵團」荷蘭友賽「沙漠之狐」阿爾及利亞，正是我非常關心的賽事！

撰文：劉舜文｜Now足球評述員

荷蘭被稱為世界盃史上最悲情的球隊之一，3次晉身決賽全數落敗，無論早年的告魯夫、尼斯堅斯，抑或近代的史尼達、雲佩斯、洛賓等名將，最多只能屈居「阿二」，的確可憐。

來到2026年，教練朗奴高文已遇上「未開波，先頭痕」情況。沙維施蒙斯十字韌帶重創，中場創造力必受影響。隊長雲迪克今屆英超及歐聯一共攻入8個頭槌，但是防守速度減慢，是不爭事實。

進攻方面，效力巴甲哥連泰斯的迪比，可能是最適應美洲氣候一員。不過他早前受傷長唞個半月，今屆巴甲8次上陣只入1球。至於利物浦的加保，整季發揮都叫一眾利迷失望，進攻三叉戟當中，只有今屆意甲攻入14球的馬倫狀態最有保證。難怪傳媒對荷蘭今屆能打破宿命不太樂觀，跟我愛隊一樣，在8大奪標熱門當中，稍為落居下風。

至於「沙漠之狐」阿爾及利亞，印象最深莫過於2014世界盃16強令德國陷於苦戰一役。今屆中場領軍的「老大哥」馬列斯，相信不用多介紹，我反而想重點推介德甲利華古遜新星馬沙。這個德國柏林出世的20歲新星技術一流，盤扭和傳送都展示不俗的足球智慧，值得期待。

雖然歌仔有得唱：「可以HEA的話，不會郁」，不過這場友賽，荷蘭明顯為備戰世界盃F組對突尼西亞而安排，阿爾及利亞則為應付J組對手奧地利「做功課」，所以相信兩隊都不敢太「HEA」。約定各位，今晚一齊睇直播，做功課啦！

國際足球友賽：荷蘭VS阿爾及利亞
Now TV 618台4/6 02:45直播

伊波拉恐慌 民主剛果熱身賽被取消

2小時前

續穿10號 比寧咸勢成三獅核心？

5小時前

【世盃仲有8日開波】英格蘭首操唔怕熱

5小時前

【世盃‧J組列強】阿根廷求破衛冕魔咒

7小時前

由韓乙衝向世盃？趙偉濟獲補選似發夢

9小時前