【十三短打】嘲諷變讚頌 麥佳亞的愛「魔」宣言

【Now Sports】哈利麥佳亞喺雙紅會頂入奠勝球後，喺社交網絡高呼“I love this club”，冇人會懷疑係虛情假意。由曾幾何時被嘲笑、失隊長臂章，默默耕耘屢立戰功，若果唔愛呢間球會，唔可能做得到。
撰文：球十三

依家講好耐啦，當日哈利麥佳亞（Harry Maguire）孭住8000萬鎊身價同壓力，由李斯特城成「魔」，因為多次防守失誤，俾人嘲諷為「麥麥送」，之後漸漸失正選，連隊長臂章都冇埋。當時，人人都相信佢喺曼聯前途似咁，聽被送走。當時信任佢嘅，可能剩番前英格蘭領隊修夫基。

曼聯呢幾年搞極都唔妥當，當視線再唔喺麥佳亞身上，佢反而屢次做救主，吓吓後衛變中鋒入波成為英雄──去季歐霸盃對波圖完場前頂入扳平、英超對葉士域治奠勝、英足盃絕殺母會李斯特城、歐霸對里昂尾段入波......，今季，佢明明喺英聯盃對甘士比尾段扳平，只怪成隊唔生性，最後都互射12碼輸波爆出世紀冷門。點計，一眾曼聯射手都要汗顏。

近年每當見到麥佳亞喺危急存亡時刻變身中鋒，鬼死咁拚搏，魔迷應該都覺得場波未完，仲有希望。今次雙紅會奠勝，正如佢賽後所講，對佢個人同曼聯都意義非凡。賽後佢喺網上發表“I love this club”，一眾新舊戰友，包括去到拿玻里踢到曉飛嘅麥湯文尼都畀心心。

走過高山低谷，麥佳亞今時今日贏盡球迷掌聲、隊友認同，贏晒。喺呢個全世界曼聯躉可能都瞓唔著嘅晚上，仲有邊個記得當年嗰個「麥麥送」？

麥佳亞近年入球
日期 比賽 意義
19/10/25 英超聯客勝利物浦2:1 84分鐘頂入奠勝
27/08/25 英聯盃客和甘士比2:2* 89分鐘頂入扳平
17/04/25 歐霸盃主勝里昂5:4# 加時補時頂入奠勝
26/02/25 英超聯主勝葉士域治3:2 47分鐘頂入奠勝球
08/02/25 英足盃主勝李斯特城2:1 補時3分鐘頂入奠勝
04/10/24 歐霸盃客和波圖3:3 補時1分鐘頂入扳平
*互射12碼負11:12
#兩回合計勝7:6

撰文：球十三
足球迷叫第十二人，冇偏愛，冷眼旁觀係十三。

讓路世盃！水晶宮不辦歐協聯勝利巡遊

3小時前

拉樸達證哥頓即將入「塞」

4小時前

安素爆落「車」 皇馬肯出逾億天價挖角？

11小時前

超越鶴臣改寫隊史 加士拿「宮」德無量

12小時前

BBC：曼聯勢簽巴西中場艾達臣

13小時前