【陳頌文隨筆】布力般Halifax訓練不同

【Now Sports】想講講我喺布力般流浪同Halifax FC First Team嘅訓練。1星期練4日波，逢星期一、五、六跟布力般訓練，到星期四就跟Halifax，星期日係比賽日。兩隊訓練不盡相同。
撰文：陳頌文

布力般訓練係3小時，首先係30分鐘classroom session，然後45分鐘gym後，剩低嗰一個半鐘係練波；Halifax嘅練波係一個半鐘。布力般嘅訓練，星期一係練一啲基本功，即係簡單嘅傳控，然後係11 VS 11，逢星期五主要練戰術，可能係啲進攻pattern、防守企位、逼搶戰術等。星期六首先有半小時係體能，然後係一個condition game，例如，如果嗰個星期嘅目標係保持控球權，可能要求傳到幾多下先可以射門。

Halifax嘅練波，會因應星期日對手踢法而去練，例如，如果對手係進攻好強，我哋就做一啲防守練習。我覺得喺英國同香港練習嘅分別，喺布力般方面可能係練波時間長，同埋會有classroom session同埋gym session先；Halifax嘅練波同香港比較，我覺得唔係有太大分別。

另外，依家同新隊友相處都唔錯，可能大家想知：隊友會唔會因為我係亞洲球員而特別照顧，或者對待我好啲？個人覺得喺踢波方面，佢哋唔會話特別照顧或者對待某個人，因為無論係新加入又好、年齡較細嘅又好，都會好平等對待。

講到場外，當然有少少代溝，始終佢哋都比我大個，話題唔一樣。例如，佢哋傾計會講到工作方面，有幾個隊友係教師，會講佢哋喺學校做老師遇到嘅事，有時我聽到，都好難一齊傾，純粹係呢方面較難融入。

撰文：陳頌文
曾效力曼城青年隊、史篤城預備組，今季由布力般流浪U21外借到夏利法斯（Halifax FC）

本欄不定期上載，特別鳴謝Halifax FC Women提供圖片

相關文章：
【陳頌文隨筆】體驗與職業球員的差距
https://sports.now.com/home/news/details?id=38890100109