【陳頌文隨筆】體驗與職業球員的差距

【Now Sports】今季我由史篤城轉去布力般流浪U21， 而喺1月外借到夏利法斯（Halifax FC）。Halifax同史篤城嘅分別係練習同比賽嘅強度。
撰文：陳頌文

依家喺Halifax係一隊球員，同之前踢預備組嘅強度唔同，另外，兩隊嘅踢法都有分別，同布力般流浪分別在於身體對抗程度，布力般流浪無論係隊友或者對手都主要係U21青年軍，大家相對嘅實力同經驗都差唔多，但Halifax嘅球員年齡比我大，經驗比我豐富，大部份隊員已經踢咗2、3年英甲比賽，已經習慣咗比賽嘅強度。

相對嚟講，我比較輸蝕，因為始終啱啱升英甲，對於比賽強度仲係適應中。

上個月第一次英甲岀場，心情當然好興奮，同時有少少緊張。第一場對手紐卡素係英甲嘅榜首球隊，同埋今年轉職業隊，首先練習會比我哋多， 我哋一星期練習兩日而佢哋可能每日都訓練。另外係個場館嘅氣氛，當日有大約2000名球迷入場，全部係紐卡素球迷，最後賽果都唔太理想，都有少少失落，但今次機會令我親身體驗到自己同職業球員嘅差距。

上年接受sports.now.com訪問時提到加強體能訓練，呢一年我定期做gym有少少成效，但都要keep住練，始終身體對抗仲係我弱點 。

今季目標係希望可以爭取多啲落場時間，當有機會落場希望有好表現，為球隊岀一分力 。長遠目標，係成為一個職業足球員。

最後都要多謝家人支持，同埋兩間球會教練畀機會我，亦都希望女子足球愈嚟愈多人認識。上年喺訪問提到希望香港女子球員「唔好放棄，如果鍾意踢，就要堅持」， 仲想同大家講繼續加油。雖然喺香港做職員足球員好困難，但希望大家唔好放棄。

撰文：陳頌文
曾效力曼城青年隊、史篤城預備組，今季由布力般流浪U21外借到夏利法斯（Halifax FC）

本欄不定期上載，特別鳴謝Halifax FC Women提供圖片

韋舒亞擔任盧頓領隊

2025/10/13 18:19