【鏟草男女】皇馬逆轉心理學（一）

【Now Sports】皇家馬德里一次，兩次，三次，喺歐聯淘汰賽總比數落後兩球時大逆轉反勝。除咗皇馬戰到最後嘅精神外，到底憑咩一次又一次對強隊，都可以成功翻盤？
撰文：June

有球迷好想知點解、有球迷話係皇家馬德里好彩、有球迷問可唔可以寫一編關於佢哋嘅心理。咁今日就簡單同大家分享少少睇法......

運動心理學家Aidan Moran 喺2012年提出，運動係靠身體配合，而贏波係靠心理。點解咁講？喺2019年一項有關忍耐力極限嘅研究入面，發現令人停止，唔再努力嘅唔係肌肉疲勞，而係各種心理因素。

所以，係大腦主宰我地嘅身體極限，而唔係身體本身。

正如大家要凌晨5點出去做運動，精神上係需要好大推動力，出到去之後先係用氣力。而當球隊喺比賽最後幾分鐘仲落後兩球時，仍然可以全隊保持高度專注，除咗推動力，氣力，亦係最講求心理堅韌力（mental toughness）。

心理堅韌力（mental toughness）

教練同運動員要意識到心理堅韌力係一種心理結構，佢對於訓練同比賽中取得成功係非常關鍵。簡單講，心理堅韌力有助球員於比賽壓力下保持決心、專注同感知控制嘅一致性。

有呢種特質嘅人，佢有絕對相信自己有能力達成目標嘅自信，以及有從挫折中恢復過來嘅能力。

皇馬傳奇球員基斯坦奴朗拿度絕對係其中一個有超強心理堅韌力嘅球員，但今日想講皇馬現役球員同教練，卻奧斯及安察洛堤，以下係一啲例子：

卻奧斯（Toni Kroos）
卻奧斯咁多年喺唔同嘅訪問，或者佢弟弟都講過，佢喺球場上，大至歐聯或世界盃決賽前都唔會緊張；呢個唔係佢嘅個性，主要因為佢知道自己嘅能力，同知道自己可以喺重要時候發揮到最好，亦發現保持平靜，喺好多場合都有好大幫助。

「成功經驗亦都可以令我安心，佢令你意識到事情唔會再對你產生太大影響。」

「我都知道呢個只係一場足球比賽，有時唔會咁順利。咁諗會令我覺得平靜同放鬆。但我仍然會保持專注，因為我確實要關注我地嘅比賽情況。」但佢話球場外，佢嘅情緒都會被牽引。所以佢學識咗喺球場上運用佢嘅冷靜同心理堅韌力。

安察洛堤
另外，教練安察洛堤亦都有超強心理堅韌力。各種訪問入面，佢都表示好相信自己嘅球員同埋知道球隊嘅能力，就算大家視皇馬為underdog，佢都表示明白但亦已經有對應方案（可以改變戰果嘅球員）。

佢喺對曼城賽前訪問時表示，知道呢場比賽係一個挑戰，但同時係一個機遇。佢亦提出要展現球員嘅個人能力，心態同個性都係重要嘅元素。比賽中，佢極少情緒起伏，無論大落後或者領先，佢都表現出冷靜嘅一面。

賽後訪問，安帥表示其實唔係太習慣咁大上落，但覺得加時嘅時間，自己球員心理質素更好。記者讚安帥好冷靜，又問安帥有無一刻諗過已經輸咗。佢好快咁答：無，無。佢話無時間諗，佢讚曼城控制到個比賽，但皇馬把握到最後兩個機會成為關鍵。

失咗一球，總比數落後兩球，安帥換走卡斯米路同摩迪，換入卡馬雲加，阿辛斯奧，球迷都以為佢唔想贏。點知，安帥換入洛迪高、卡馬雲加、阿辛斯奧都係最後兩球嘅關鍵人物。所以，心理堅韌力決定咗一個人點可以有效咁應對挑戰、壓力源同壓力，無論佢身處喺咩情況。

最後，心理堅韌力其實係由4個組成部分組成，心理學家稱為「4個 C」：

1. 遇到障礙及困難情況時感到事情於自我控制範圍內（Control）
2. 下定決心及堅持完成目標（Commitment）
3. 對自身能力及人際交往能力的信心（Confidence）
4. 視挑戰為機遇（Challenge）

對於運動員同教練嚟講，擁有心理堅韌力令你比對手更有優勢。除此之外，心理堅韌力可以令人能夠更好咁管理壓力，克服挑戰，並於日常生活中有更好表現。呢一點，喺皇馬球員同安察洛堤身上都完全展現。

下次再同大家講吓，除咗呢份心理堅韌力之外，仲有咩因素可以令皇馬球員咁淡定逆轉劣勢，而且狀態比上年更提升。

撰文：June
旅皇迷一名。喜歡旅行，喜歡足球；享受在場邊搖旗吶喊，經歷足球的喜怒哀樂。

歡迎瀏覽球十三fb專頁若得到波友一個like就是我們團隊的一大鼓舞：
www.facebook.com/ballthirteen

圖片來源 : ©AFP

夏神冇落場告別 隊友拋起補數

14小時前

肥安否認皇馬冷待賓斯馬：之後仲有活動

20小時前

賓斯馬入12碼謝幕 領皇馬和波「畢」業

2023/06/05 02:45

【訪問】皇馬球迷會會長June：貓變獅子成就C朗

2023/06/04 22:07

【特稿】戎「馬」半生 近代最強

2023/06/04 21:44