【我們都是這樣睇波的】我愛金絲雀（下）

【now.com體育】大家好！童話故事都始終會完結，我早前已經返到香港了！由於喺英國只可以用手機寫稿，所以好多細節可能未能詳細講述，依家等我一口氣講呢十多日所發生嘅事吧！ 撰文：XXL16

上回講到我去杜根咸（Dagenham）睇隊波喺英乙鬥哈特普爾，同前諾域治前鋒古尼頓（Jamie Cureton）相聚，跟住一日就要作客聖占士公園睇紐卡素對諾域治。當日早上7點起身梳洗同食早餐，8點半由卡諾路球場出發坐球會嘅coach去紐卡素，大約2:30分到步，行一行clubshop，4:00開波，紐卡素作客球迷區喺第3層，我記得行咗7層樓梯先上到坐位！當睇完返去B&B（Bed & Breakfast，即係我喺英國住嘅地方，可以話有少少似民宿，只提供早餐及床位）嘅時候，一睇個鐘－－12:15分！一日就無晒。

跟住幾日到星期四都好輕鬆，其中星期二、三晚我都去左街尾嘅酒吧睇歐聯，主要因為B&B無得睇，雖然我唔係阿仙奴同曼聯嘅球迷，但酒吧只係播放呢兩場比賽，始終都係英格蘭球隊吧！星期四晚，我被邀請到BBC Radio Norfolk的studio，參與佢哋專為諾域治而設嘅清談節目“The Scrimmage”，其實我唔係第一次上佢哋嘅節目，但第一次坐足1個小時，我覺得自己英文係好一般，所以講嘢時間實在唔太多，不過當佢問到我上星期六去咗邊度，我都可以對答如流。原來古尼頓又響另外一條電話線上，由佢本人再親身解釋點解我去睇佢踢波，同之後發生嘅事。真嘅，我feel到古尼頓內心真係好開心見到我去捧場睇佢踢波，雖然我上次已經講過，我對杜根咸呢間球會只係有1.05英鎊嘅貢獻！

到比賽之前一日，喺你未享受任何權利之前，都要先履行一啲義務，真係要非常感謝諾域治clubshop經理Diane，幫我特別要求向波衫生產商errea訂造兩條XXXXL嘅諾域治主場波褲，條褲size啱啱好，他日老友如果喺球場會見到我著嚟踢波！我其實一直想買諾域治嘅波褲，奈何從來都冇好fit嘅意大利人身型（errea來知意大利品牌），所以唯有希望佢哋迎合我啦！唔單止咁，我亦另外買咗6件XXXXXXL衫，包括3件Training Tee，兩件領隊著開嘅polo同一件抓毛外套。呢方面就真係好高興佢哋肯聽從球迷意見，做番齊啲碼；由於今次我買得幾多訓練服，所以原本買咗8件諾域治Tee，依家都要減一半，當然仲未計其他嘅精品。我唔算係購物狂嗎？我全部買嘅都會著上身！

到諾域治對西布朗比賽當日，響早上10:45分我準時到球場，要再感謝球會公關部非常細心嘅安排，我去球會室內嘅reception等候，當時響室外亦有唔少球迷響鐵馬之外，但有兩位超好人嘅保安叔叔協助，我總共4件波衫都簽晒名，而同球員合照嘅任務，用咗1小時就完成！不過，球員始終都係人，好似列特文同謝路美可能想集中之後嘅比賽吧，所以無講太多嘢，不過佢哋態度都係友善嘅；就算連來自唔多識講英文嘅剛果民主共和國，我嘅頭號目標馬保卡尼都一樣可以用簡單英語no problem同ok對答；至於韋達卡、賴恩班列特、加利賀柏、加利奧尼爾、多蘭斯、馬菲查維斯、正選同後備門將魯迪、迪格蘭魯迪都遂一簽名同合照。至於未提嗰啲，就梗係有少少唔同嘅事情發生......

當馬田奧臣同及加比賓行入reception，知道我係由香港嚟睇波，分別都問咗我搭幾耐飛機嚟，同埋會留幾耐。兩位臨離開前，都分別異口同聲咁講：「希望我哋今日可為你贏呢場波！」至於挪威國腳迪提，上季見過佢一次，我問佢係咪仲有上Twitter度玩？奇怪地，佢話已經無玩好耐啦！但我記得佢官方嘅Twitter戶口，係知道我會嚟搵佢啊，咁我明白啦，原來佢同明星一樣，有助手代勞！

之後我見到侯臣，當然把握良機，問佢之前作客對韋斯咸，點解咁大膽徒手執起一隻受傷嘅鴿子？因為聽英國嘅球迷講，你喺英國所見嘅鴿子，同見老鼠冇乜分別，都係傳播病菌根源之一！你估侯辛點答：「其實我見到隻鴿子喺地下受傷，當時只係諗住執起佢送去安全地方，我估個個都會咁做嘛！」（但我心諗你之後冇機會洗手啊！）之後，我就同佢大笑！

每次旅程，都一定有嘢係你估唔到。之後兩位入嚟嘅係球會隊長羅素馬田同羅比巴迪，其實當每位球員入到嚟，我自己會公式地用英文介紹自己個名，話我來自香港，之後請佢哋簽名、合照。當我向羅素馬田介紹自己時，佢回應係“I remember you, you come back! I saw you in Wycombe a few years ago because you go to see Holty!”。我諗一諗之後，佢講得無錯，因為我2007年真係有去過韋甘比呢間球會，搵現已成為諾域治其中一位教練嘅加利賀治（Gary Holt），當時佢應該係喺陣中，其實佢入嚟已經接近11:45，所有球員必須要在此時間報到，否則罰錢，遲到嗎？但羅素馬田一一簽晒名，當我同佢合照時，羅素馬田仲問我係咪仲鐘意加利賀治？我答當然啦，因為第2日我已經搵咗佢影相啦。

至於羅比巴迪係一個經常帶著笑容嘅球員，我發現之前位位球員簽名都就咁放響台上嘅波衫簽，但羅比巴迪親自拉起件波衫比羅素馬田簽，目的就係希望個名可以簽得靚啲！其實大家點簽都冇問題，但由此可見羅比巴迪對簽名嘅細節都咁細心，抵讚！

荷拉漢喺11:43分入到嚟，其實我見佢已經好趕時間，同佢隻手已經拎住對白色波砵，如果荷拉漢話當時話遲到會被罰錢，我唔會為難佢，但荷拉漢諗咗兩秒，話：「That's Ok！」慢慢放低波砵，簽完名同影完相先跑上去，令我都講Sorry！當荷拉漢跑上樓梯一刻，有一位職員攔截佢，話佢係最後一個入嚟，差啲遲到！我心都定一定，好彩係差啲，如果唔係真係過意不去！

之後我又行咗去球會另一邊，喺Director Enterance見到諾域治CEO麥拿利（David McNally），當然我都去介紹自己，之後佢諗咗一陣，叫我跟住佢，我就咁行入去Director Enterance，一入去簡直係另外一個世界，無人著波衫，男嘅西裝打呔女嘅著suit，我見到一位高貴嘅女士－－英國「方太」迪利亞史密夫（Delia Smith），佢打完招呼後第一句就係Give me a kiss，我未及反應就比佢錫左去右邊面！（當日我已經馬上報案畀女友知道！）迪利亞史密夫話佢同先生好多年之前到過香港，響一間位於淺水灣好靚嘅酒店住過，佢話希望可重臨香江旅行！

呢個世界好公平，畀咗你一啲野，就一定要拎番走你另一啲嘢，雖然場波嘅結局係我唔想見到（主場負0:1），但我可以肯定同大家講，坐主隊後備席後3行嘅我，知道係應該會發生－－上半場攻極唔入，下半場當好多球迷未入番場就已經俾西布朗反擊得手，我第一個反應係冷笑。成場射中門框一隻手數得曬，所以主場全失3分，連續英超第3場輸波，都係合理戰果吧！絕對冇話球證誤判、無運，或者人哋係咁拖延時間，踢得唔好咪輸囉。正如我返到B&B，第一句同一個後來先知係西布朗嘅球迷講，費查及耶確完全控制成個中場，加上3次俾左腳重炮布隆特起腳，及對方打雙箭頭，西布朗值得拎呢3分！當呢位年青人表露身分，加上又知道我來自邊度之後，為我覺得難堪。當然，之前有多位球員嘅親切同誠懇嘅態度，我係在心中，因為除咗羅素馬田一個球員之外，佢哋其實全部都唔識我，你點對人嘅態度，係冇得造作。

如果你問今次嘅旅程究竟有冇遺憾？梗係有啦，但並唔係可能係你哋諗，我未能夠親眼睇住諾域治贏任何一場比賽，而係我未能應約去見一個人－－前諾域治中鋒，現時效力英甲韋根嘅格蘭賀治（Grant Holt）。因為韋根響聯賽盃已經一早出局，而BBC Radio Norfolk嘅評述團隊，一向都會喺每一場諾域治嘅比賽，邀請一位前諾域治球員作客席嘉賓評述，而格蘭賀治本人就正正親身去葛迪遜公園球場去做客席嘉賓評述。我早兩日前，已經喺格蘭賀治twitter戶口留言，話我知道佢會去葛迪遜公園，問可唔可以同我影張相。因為佢係我傾慕已久嘅英雄！早前香港球王胡國雄先生離世，好多上一輩球迷都表示可惜，傷感；我馬上問自己一句：究竟我會唔會為一個足球員嘅離世而覺得惋惜？原來真係有！因為我自己曾經認為，只會響打足球game嘅時候用諾域治先可以對曼聯，曼城，車路士，阿仙奴或者利物浦先入到佢哋波，但格蘭賀治竟然響現實世界之中同我地實現！格蘭賀治回覆我twitter話，佢下午5:30分會到球場，我當日見到回覆已經開心咗半日！

但係，我想引用一段大家都耳熟能詳嘅獨白：嗰個落雨嘅晚上，嗰條濕滑嘅公路，嗰個粗心大意嘅司機......唔係啊，因為冇意外發生過，但真係塞車，當日一整日落雨，去到利物浦市已經下午5時，但天雨路滑，令到我要上6時先到球場，亦令到我同格蘭賀治緣慳一面！佢已經34歲，我唔知佢會唔會似古尼頓一樣踢到40歲，但世事嘅野話唔埋，亦靜待之後發展。

至於呢一場聯賽盃第4圈比賽，結果雙方激戰120分鐘都係1:1，互射12碼愛華頓贏4:3晉級！呢場波，我坐（其實冇坐過！）嘅位置係作客球迷第2行－－氣氛好到呢，因為球隊點進攻防守，我只可以睇住對面部遲咗兩秒嘅大電視先見到；但當然啦，因為葛廸遜公園球場嘅作客球迷區，係電視熒光幕右攻左，左翼到角球旗嘅位置，由於坐得近，所以嗰一部分所發生嘅事，我哋球迷都會「做野」。一開波頭20分鐘，諾域治踢得主動，令主隊鴉雀無聲，我哋就連續唱“This is a library！”（呢度係圖書館嗎？），4次為1節！當愛華頓球員響我哋呢邊出波跣腳，我哋又會大聲咁恥笑佢係垃圾！當冇咩事做，我哋又自動唱會歌“On The Ball City！”，到下半場當馬田奧臣或者查維斯左邊空晒，我哋又會大叫“Pass to left wing”，或者佢哋個名Martin或Matt。球隊的第12人，咪就係要咁做！曾經有人講過球場咁大，你叫乜野都好，入面係聽唔到嘅，但如果球場係無跑道，你近場邊嘅話，球員真係會聽到！

好多朋唔知道，我其實由1991年英甲時代開始已經支持諾域治，至今已經有24年，原因係因為隻雀！當我細細個9、10歲左右，一個落雨嘅下午，當做緊功課嘅時候，一隻黃綠色彩雀突然飛到屋企窗花前，佢同我玩又唔怕人，於是屋企收養左佢，到今天我依然有養愛情鳥，又加上因為自己鐘意踢波，雖然當時資訊唔發達，但因為求學時期，學校必須要訂英文報紙，所以對諾域治嘅認識開始加深，我亦好記得我第一件球衣就係響1994年，自己去銀行買匯票，寄去諾域治嘅clubshop；從今次嘅旅程我得知道，原來當時有份處理我呢個order嘅職員，就正正係呢十幾廿多年以來，一路同我經電郵接觸，現在嘅clubshop manager！

從今次嘅旅程，就算連當地可能係屬於一啲比較年青嘅球迷都會質疑。我，冇錯係球會clubshop其中一個大客戶，但獲邀請喺球員進入嘅接待處，而所有球員簽完名或合照完先離開，以及從球員嘅反應，同埋被羅素馬田「點相」，又或者球會嘅行政總裁麥拿利邀請我入去行政人員嘅lounge去見班主、再有球會為我向球衣生產商errea特別訂做嘅主場波褲......，一切一切，連當地嘅球迷就算去申請亦冇呢方面嘅安排，究竟呢啲嘢係咪因為我畀咗錢就可以得到？

想引用clubshop manager對我嘅答案：假若你喺曼聯、曼城、車路士、阿仙奴、利物浦或者係熱刺，又或者喺球會有同樣嘅消費，你覺得你會唔會得到同等嘅待遇呢？

撰文：XXL16
fb：https://www.facebook.com/profile.php?id=689358876

相關文章：
【我們都是這樣睇波的】我愛金絲雀（上）
http://sports.now.com/home/news/details?id=13534718492

（我們都是這樣長大、都是這樣睇波的，本欄再接再勵，讓球迷發表睇波經歷與心聲，以及訪問足籃狂迷，暫不定期上載。各路英雄如欲與大家分享睇波故事或感受，不妨聯絡我們。）
email：ballthirteen@hotmail.com
球十三fb專頁：
https://www.facebook.com/ballthirteen

森馬維小腿受傷無緣攻「城」

2小時前

熱刺深陷降班危機 推遲續購季票死線

4小時前

羅仙尼亞：徹查陣容外洩事件

6小時前

眾門神齊齊安慰堅斯基

6小時前

爭「霸」冇人睇？森林兩度減價賣波飛

11小時前