【一生一世盃】劉舜文：最想同路維睇波

【Now Sports】著名足球評述員，本身是德國狂迷的劉舜文於1986年世盃開始「入坑」，今屆當然撐德國撐到底，他笑言，最希望與前德國名帥路維一齊睇波。

舜文早於1986年開始睇世界盃，被問到一想到世界盃會聯想到甚麼時，他即時口若懸河：「聯想到乜？就係一個月只做一件事！今屆更加係個幾月只做一件事。」他表示世界盃難忘的事太多：「有幸人生第一場睇嘅直播，就係1986年經典8強巴西對法國，從此入咗坑成為球迷。」

一個多月不定時兼密集式評述，舜文今屆賽事期間會有很長時間在錄影廠度過，談到最想和誰一起睇今屆賽事，他笑言：「最想同2014年世界盃冠軍隊教練路維一齊睇，同佢握個手，哈哈！」

不必問，他當然支持德國，說到愛隊的強弱如數家珍：「整體實力未算頂頭大熱，不過個心點都撐到底！最強會係天才中場線，穫斯、穆斯亞拿嘅雙核，只要有足夠狀態，足以撕破任何防線，甚至乎有望入選嘅神童卡爾，都令人期待。」

「隊波缺點係防線穩定性，有啲擔心，包文、紐布等等現有門將級數，亦好難同12年前高峰期嘅紐亞相提並論。」他表示今屆最留意的球員是穫斯：「雖然佢喺利物浦發揮不及利華古遜年代，但我仍然相信佢嘅技術同閱讀球賽能力，係世界頂級的。德國以外，最留意係奧拉斯。呢兩屆佢喺拜仁慕尼黑嘅表現，真係出神入化，又好睇又好食，睇佢踢波真係賞心樂事。」

捧德國，不過舜文認為法國更具冠軍相：「如果德國同法國都係首名出線的話，好大機會16強就碰頭。到時勝出一方隨時直闖4強。的確，法國嘅進攻組合比德國更強，安巴比、奧斯文丹比利、奧拉斯、卓基、甚至巴黎聖日耳門新星杜爾，都係頂級戰將。」

球迷熟識的舜文，當然不止一名評述員，他過去多次在大賽親自創作歌曲，唱到街知巷聞，可惜球迷今屆恐怕會失望了。「今年唔會創作啦，哈哈！年紀唔輕，同時兼顧唔到太多事情，就好好享受賽事好啦！」

下次預告：背景南轅北轍的新婚夫婦，睇波角度有否不同？

【一生一世盃】，睇波美好回憶，可以係一生一世。決賽周前訪問不同界別球迷，分享睇世盃的難忘回憶，以及對今屆賽事的睇法。

相關文章：
【一生一世盃】居港西班牙人：決賽周兩邊飛
https://sports.now.com/home/news/details?id=39606745542
【一生一世盃】馬評人CP難忘與故友
https://sports.now.com/home/news/details?id=39601023934
【一生一世盃】植詠珊：最想約螢花隊友睇波
https://sports.now.com/home/news/details?id=39597496200

迪莊季初缺陣 巴塞勢獲FIFA高額賠償

2026/07/25 20:17

冇做美斯隊友 禾仙拿傳落戶高路高路

2026/07/25 14:19

IOC拒就世界盃紅牌風波調查恩芬天奴

2026/07/25 13:33

洛迪接受背部手術

2026/07/25 10:52

奧達文迪宣佈國際賽退役

2026/07/25 05:02