【一生一世盃】幕後英雌：今屆大不同

【Now Sports】當球迷睇聽到評述員口若懸河、妙語如珠，可別忘記孜孜不倦的幕後工作團隊。對於Penny而言，今屆世界盃未開打已是不一樣的體驗。

在NowTV資料搜集組工作的Penny，從來為評述員提供資料，還會撰稿、譯稿，揀選廣東話評述場次及處理球員譯名等，來到四年一度的大賽更是忙得不可開交：「同以往大賽一樣，我都會準備一本『天書』畀評述員，當中包括32支決賽周球隊近兩年所有比賽資料，令佢哋對各隊加深認識。」

今屆賽事既是在11月，而非慣常在6月開打，那就難倒資料搜集員：「其實最大分別係今次決賽周喺球季進行中舉辦，之前要同時處理各大聯賽開咧，兼顧世界盃準備工作變得煩亂、困難。以往做世界盃同歐洲國家盃都係6月，基本上當球季1月轉會窗關閉後，各球會嘅球員名單唔會有太大變動，2月就可以相對地專心準備世界盃或者歐國盃，但今次唔同，當開始準備世界盃，就撞正各大聯賽同埋歐洲3大盃賽開咧，之前要處理大量轉會，所以（準備世界盃工作）開頭進度緩慢。」

箇中苦與樂，只有媒體工作者自己知。「講到苦，呢幾個月除咗瞓覺同食嘢嘅基本生活，就係工作，謝絕好多娛樂同埋朋友飯局。好處係，藉呢個工作機會認識呢32支球隊。」

就媒體的球員譯名，坊間偶有意見，世界盃覆蓋大量不同語言的國家，Penny承認這問題相當複雜：「我自己嘅處理方法係盡量根據唔同語言去處理，例如球員嚟自卡塔爾，就會以佢阿拉伯名搵讀音，如果嚟自塞爾維亞就以塞爾維亞文搵讀音，最理想係搵到球員自我介紹嘅片段，根據佢自己點讀去處理，佢冇理由讀錯自己個名啫。」她補充：「當然譯出嚟結果，有啲音唔係咁易配到一個廣東話字，冇可能百份百準確。」

一邊工作一邊睇波，對體育傳媒人而言是家常便飯，談到寓工作於睇波，她說：「近幾年少咗前線工作，較多時間都係聽住波做嘢，有緊張鏡頭至會將對眼移返去電視。咁樣睇當然同以前用球迷身份係唔同，冇咁開心同暢快。」

本身熱愛睇波的她，一諗起世界盃即時聯想到其愛隊意大利。「幾時開始睇世界盃？哎呀，暴露年齡，係1990年意大利世界盃。最難忘係2006年意大利對德國場準決賽，當時我喺另一間公司工作，比賽時喺九展錄影廠睇，場波嘅比賽張力令人唞唔到氣，講嘅唔係唔舒服嘅唞唔到氣，而係好緊張。場波做完後，我都翻睇過幾次，去感受嗰種由唞唔到氣，到舒一口大氣嘅暢快，最重要，梗係意大利贏波，係咪先！」

所以，Penny對世界盃的一世回憶，就是2006年那一屆。「意大利當時係經歷打假波「電話門」事件，嗰時意大利係俾人睇唔起、唾棄，去到最後爭氣捧盃，係好深刻回憶。」她續說：「如果講親身睇波，世界盃就未有，或者日後會去，但試過睇2016年歐洲國家盃，一場係16強意大利對西班牙，一場係8強法國對冰島。抽籤買飛時我係唔知呢個對賽，當知道呢個（意西大戰）matchup，勁呀，又有我愛隊又咁強戲碼，最後仲要意大利贏，真係有今生冇來世。」

Penny不乏世界盃精品珍藏，主要是購買世界盃特刊，但她最珍而重之是1990年世界盃集圖冊：「嗰陣讀緊書，冇咩錢買貼紙，所以本集圖冊仲有好多窿窿，我依家仲keep住。不過你唔好叫我影張相畀你，本嘢喺床下底要搵番出嚟好大工程。」

愛隊既是緣盡決賽周，她說到今屆支持邊隊時笑言：「我成日同人講今屆支持加拿大，因為隊波用嚟用去都係嗰班球員，又比較少友賽，做呢隊波做得好快，所以我好支持佢哋。呢個係扲嚟講笑啫，其實冇意大利（收起笑容），都冇話捧邊隊lu。」

「4年前2月，我同啲同事講好有心水法國攞冠軍，反而今次仲未有明顯心水。總覺得球季中間舉行嘅世界盃，多咗不確定性。」談到神射手，她亦表示沒明確心水，只提到利雲度夫斯基受注目：「但取決於波蘭行到幾遠。」

被問到今屆最想與誰一起睇波時，Penny謂：「入咗呢行後，都好少諗同咩人睇波，因工作環境，有時係同同事一齊睇，有時自己坐喺個位睇，冇乜得揀，呢行做得耐，唔係好有憧憬同咩人一齊睇波。」

下期預告：
11/11 Now靚女主持佩芝睇好南美洲球隊奪冠

相關文章：
【一生一世盃】足球小女將最愛簡尼
https://news.now.com/home/sports/player?newsId=sp37300952330
【一生一世盃】新丁KK眼中三大美男
https://sports.now.com/home/wc2022/news/details?id=37269461628
【一生一世盃】田雞：同星爺睇完波拍《少林足球》
https://sports.now.com/home/news/details?id=37268491720
【一生一世盃】資深體記：現場睇法國圍揪巴西
https://sports.now.com/home/news/details?id=37256536010
【一生一世盃】大佬孝：諗過剪河童頭
https://sports.now.com/home/news/details?id=37218976745
【一生一世盃】集圖發燒友的摯愛
https://sports.now.com/home/news/details?id=37212954906
【一生一世盃】英格蘭，還是撐 / 唱下去
https://sports.now.com/home/news/details?id=37212954904

【一生一世盃】，睇波回憶，當然可以係一生一世，本欄由筆者或被訪者分享這個大賽嘅睇波難忘經歷，或對今屆賽事嘅睇法。

前巴西國腳薛卡路士離世終年56歲

2024/10/26 05:21

「渣古」世盃後抑鬱 日日以淚洗面

2024/10/17 21:43

超級電腦預測英軍下屆世盃得季軍

2024/10/17 09:49

【十三短打】問德文答英文 杜曹先贏一仗

2024/10/16 21:42

舒利亞：杜曹非贏世界盃不可

2024/10/16 20:26